لندن ( پاک ترک نیوز) برطانیہ میں رولز رائس کے چھوٹے جوہری ری ایکٹرز کے لیے بھاپ سے چلنے والی بڑی ٹربائنز مقامی طور پر تیار کرنے کا فیصلہ کیا گیا ہے، جس سے ملک میں سیکڑوں نئی ملازمتیں پیدا ہوں گی۔جرمن انجینئرنگ کمپنی زیمنز انرجی نیوکاسل میں اپنی فیکٹری میں ٹربائنز اور اہم پرزے تیار کرے گی۔ اس منصوبے میں دسیوں ملین پاؤنڈ کی سرمایہ کاری متوقع ہے، جبکہ تقریباً 550 نئی ملازمتیں پیدا ہوں گی۔یہ پہلی مرتبہ ہوگا کہ برطانیہ میں دو دہائیوں سے زائد عرصے بعد بڑے پیمانے پر بھاپ کی ٹربائنز تیار کی جائیں گی۔ تیار ہونے والی ٹربائنز رولز رائس کے چھوٹے ماڈیولر ری ایکٹرز میں استعمال ہوں گی، جن میں انگلینڈ اور ویلز کے علاقے اینگلیسی میں تعمیر کیے جانے والے تین ری ایکٹرز بھی شامل ہیں۔
یہ بھی پڑھیں: زمین اور خلا میں بجلی پیدا کرنے والے جدید جوہری ری ایکٹرز کے لیے نیا ایندھن تیار
برطانوی حکومت نے گزشتہ سال رولز رائس کو ملک کے پہلے تین چھوٹے ماڈیولر ری ایکٹرز ڈیزائن اور تیار کرنے کا معاہدہ دیا تھا۔ ہر ری ایکٹر 470 میگاواٹ بجلی پیدا کرنے کی صلاحیت رکھے گا اور منصوبے کا مقصد 2030 کی دہائی کے وسط تک اس ٹیکنالوجی کی تجارتی افادیت ثابت کرنا ہے۔برطانوی حکومت نے جوہری ری ایکٹرز کے 70 فیصد پرزے ملک میں تیار کرنے کا ہدف مقرر کر رکھا ہے۔ حکومت کے مطابق مقامی پیداوار سے توانائی کا تحفظ مضبوط ہوگا، روزگار پیدا ہوگا اور برطانوی صنعت کے لیے برآمدی مواقع میں اضافہ ہوگا۔نیوکاسل کی تاریخی پارسنز ورکس فیکٹری میں ہائی پریشر ٹربائنز اور والو کیسگز تیار کیے جائیں گے، جبکہ اسے رولز رائس کے ایس ایم آر بیڑے کی ٹربائنز کے لیے سروس ہب بھی بنایا جائے گا۔
