ماسکو ( پاک ترک نیوز) روس نے برفانی پانیوں میں چلنے والے آئس بریکر بحری جہازوں کے لیے 15 چھوٹے جوہری ری ایکٹرز تیار کرلیے، جبکہ مزید 13 ری ایکٹرز کی تیاری جاری ہے۔روسی جوہری توانائی کی کمپنی روساٹوم کے سربراہ الیکسی لِخاچیف کے مطابق تیار کیے گئے ری ایکٹرز RITM-200 ٹیکنالوجی پر مبنی ہیں، جن میں سے ہر ری ایکٹر 175 میگاواٹ تھرمل توانائی پیدا کرنے کی صلاحیت رکھتا ہے۔
روس کے مطابق ان ری ایکٹرز کی آپریشنل عمر کم از کم 40 سال ہے، جبکہ ان کا قد تقریباً 7.3 میٹر اور قطر 3.3 میٹر ہے۔RITM-200 کی خاص بات اس کا جدید انٹیگریٹڈ ڈیزائن ہے، جس میں ری ایکٹر کور اور اسٹیم جنریٹرز ایک ہی پریشر ویسل میں نصب کیے گئے ہیں۔ اس ڈیزائن سے روایتی بحری ری ایکٹرز کے مقابلے میں نظام کا حجم تقریباً ایک تہائی کم کیا گیا ہے۔
یہ بھی پڑھیں: فیسکو، گیپکو اور آئیسکو کی تنظیم نو کا پلان منظور
یہ ٹیکنالوجی روس کے پروجیکٹ 22220 آئس بریکرز میں استعمال کی جارہی ہے، جو تقریباً تین میٹر موٹی برف کو توڑتے ہوئے آرکٹک کے انتہائی سرد علاقوں میں سفر کرسکتے ہیں۔روساٹوم اب اسی ٹیکنالوجی کو شہری اور صنعتی ضروریات کے لیے بھی استعمال کرنے کی تیاری کررہا ہے۔ RITM-200N نامی زمینی ورژن پر مشرقی سائبیریا کے یاقوتیا خطے میں پاور پلانٹ کی تعمیر شروع کردی گئی ہے، جو مقامی آبادی اور معدنی ذخائر کو بجلی فراہم کرے گا۔
