واشنگٹن ( پاک ترک نیوز) ایرانی صدر مسعود پزشکیان کا کہنا ہے ایران امریکا کے ساتھ جنگ جاری رکھنا نہیں چاہتا، اب یہ فیصلہ امریکا کو کرنا ہوگا کہ وہ جنگ ختم کرنا چاہتا ہے یا نہیں۔امریکی نشریاتی ادارے فوکس نیوز کو دیے گئے خصوصی انٹرویو میں مسعود پزشکیان نے کہا کہ اگر اختلافات مذاکرات کے ذریعے حل کیے جاسکتے ہیں تو ایک دوسرے کو قتل کرنے کی ضرورت نہیں ہونی چاہیے۔ ان کے مطابق ایران نے کبھی جنگ نہیں چاہی اور نہ ہی اب جنگ جاری رکھنے کا خواہش مند ہے۔ایرانی صدر نے مؤقف اختیار کیا کہ اسرائیل کی کارروائیوں اور اشتعال انگیزی کے نتیجے میں جنگ ایران پر مسلط ہوئی، تاہم تہران اب بھی تنازع کے خاتمے کے لیے سفارتی راستہ اختیار کرنے پر آمادہ ہے۔
یہ بھی پڑھیں: تحریک انصاف کا لانگ مارچ 5اکتوبر تک ملتوی کرنے کا اعلان
مسعود پزشکیان نے کہا کہ ایران جنگ جاری نہیں رکھنا چاہتا، امریکا کو فیصلہ کرنا ہوگا کہ وہ اسے ختم کرنا چاہتا ہے یا نہیں۔ انہوں نے امریکی صدر ڈونلڈ ٹرمپ کے ساتھ جنگ کے خاتمے کے لیے کسی معاہدے تک پہنچنے پر آمادگی بھی ظاہر کی۔ایرانی صدر نے ماضی میں طے پانے والے معاہدے کا حوالہ دیتے ہوئے کہا کہ اگر دونوں ممالک کسی سمجھوتے تک پہنچ چکے تھے تو تقریباً دو ہفتے بعد وہ عمل کیوں ختم ہوگیا۔ ان کے مطابق ایران اس معاہدے کے طے شدہ فریم ورک کے تحت آگے بڑھنے کے لیے اب بھی تیار ہے۔پزشکیان نے واضح کیا کہ کسی نئے معاہدے کے لیے بین الاقوامی قانون کی پاسداری ضروری ہے۔ ان کا کہنا تھا کہ اگر موجودہ امریکی حکومت بین الاقوامی قانونی دائرہ کار میں رہتے ہوئے معاہدہ کرنا چاہتی ہے تو ایران مذاکرات کے لیے تیار ہے۔
انہوں نے امریکا کی جانب سے پابندیوں اور فوجی دباؤ پر بھی تنقید کی اور کہا کہ ایران دباؤ کے باوجود مزاحمت جاری رکھے گا۔ ساتھ ہی انہوں نے کہا کہ ایران اپنے جوہری پروگرام کے حوالے سے بین الاقوامی نگرانی اور تصدیق کے لیے بھی آمادگی ظاہر کرچکا ہے۔ایرانی صدر نے امریکا کے آئندہ وسط مدتی انتخابات کا حوالہ دیتے ہوئے کہا کہ ایران کے لیے اس بات سے کوئی بنیادی فرق نہیں پڑتا کہ معاہدہ امریکی انتخابات سے پہلے ہوتا ہے یا بعد میں۔ ان کے مطابق تہران کی ترجیح یہ ہے کہ اگر واشنگٹن بین الاقوامی قوانین کے دائرے میں رہتے ہوئے معاہدہ کرنا چاہتا ہے تو مذاکرات کیے جائیں۔
