اسلام آباد ( پاک ترک نیوز ) حکومت کی جانب سے ٹیکس دہندگان کو سہولت فراہم کرنے کے لیے اسٹیٹ بینک آف پاکستان نے کمرشل بینکوں اور نیشنل بینک آف پاکستان کی متعلقہ شاخوں کے اوقاتِ کار میں توسیع کر دی ۔
اسٹیٹ بینک کے جاری کردہ سرکلر کے مطابق، فیڈرل بورڈ آف ریونیو کی درخواست پر آج بینکوں کی مخصوص برانچیں شام پانچ بجے تک کھلی رہیں گی تاکہ شہری سرکاری ٹیکس اور ڈیوٹیز جمع کرا سکیں۔
اس کے علاوہ پیر کے روز تمام متعلقہ بینک شاخیں رات 8 بجے تک کھلی رہیں گی، جبکہ منگل کو کمرشل بینکوں کے اوقاتِ کار رات 10 بجے تک بڑھا دیے گئے۔ نیشنل بینک کی کسٹمز وصولی کرنے والی شاخیں منگل کو رات 11 بج کر 59 منٹ تک خدمات فراہم کریں گی۔
یہ بھی پڑھیں: وزیرِاعظم اپنا گھر پروگرام کا دائرہ کار وسیع ،اوور سیز پاکستانی بھی فائدہ اٹھا سکیں گے
اسٹیٹ بینک نے تمام بینکوں کو ہدایت کی ہے کہ وہ نیشنل انسٹیٹیوشنل فیسلیٹیشن ٹیکنالوجیز کے ذریعے سرکاری لین دین کی خصوصی کلیئرنگ کے لیے اپنی متعلقہ شاخیں مقررہ اوقات تک کھلی رکھیں۔
سرکلر میں مزید کہا گیا ہے کہ شہریوں کی سہولت کے لیے تمام ڈیجیٹل ادائیگی کے ذرائع، جن میں انٹرنیٹ بینکنگ، موبائل بینکنگ ایپس، اے ٹی ایمز اور دیگر ڈیجیٹل پلیٹ فارمز شامل ہیں، بلا تعطل فعال رکھے جائیں تاکہ ٹیکس اور سرکاری واجبات کی آن لائن ادائیگی آسانی سے کی جا سکے۔
