ٹی 20 ورلڈ کپ: نیدرلینڈ کیساتھ مقابلہ، 148 رنز کے تعاقب میں پاکستان کی بیٹنگ جاری

کولمبو : (پاک ترک نیوز)آئی سی سی ٹی20 ورلڈ کپ کے افتتاحی میچ میں پاکستان اور نیدرلینڈ کی ٹیمیں کولمبو میں مدِ مقابل ہیں۔ پاکستان کے کپتان سلمان علی آغا نے ٹاس جیت کر نیدرلینڈ کو پہلے بیٹنگ کی دعوت دی، جس کے بعد ڈچ ٹیم نے پاکستان کے لیے 148 رنز کا ہدف مقرر کیا۔
نیدرلینڈ کے اوپنرز مائیکل لیوٹ اور میکس اوڈووڈ نے اننگز کا آغاز کیا اور پہلے 28 رنز کی شراکت قائم کی، تاہم اوڈووڈ صرف 5 رنز بنا کر آوٹ ہوئے۔
لیوٹ 24 رنز کے ساتھ بولرز کا شکار بنے۔ تیسرے کھلاڑی کولن ایکرمین 20 رنز بنا کر آوٹ ہوئے، جبکہ باس ڈی لیڈ نے 30 رنز کی اننگز کھیل کر بولرز کا مقابلہ کیا۔
پاکستان کی جانب سے محمد نواز اور سلمان مرزا نے بہترین بولنگ کا مظاہرہ کیا۔ محمد نواز نے دو کھلاڑیوں کو آئوٹ کیا، جبکہ سلمان مرزا نے آخری اوور میں دو اہم وکٹیں حاصل کر کے نیدرلینڈ کی ٹیم کو 147 رنز پر محدود کر دیا۔
اس موقع پر ایسا لگ رہا تھا کہ ڈچ ٹیم 160 سے 170 رنز تک جا سکتی تھی، لیکن پاکستانی بولرز نے شاندار کم بیک کرتے ہوئے آخری 6 وکٹیں صرف 20 رنز کے عوض حاصل کیں۔
پاکستان کی جانب سے سلمان مرزا نے سب سے زیادہ تین کھلاڑیوں کو آوٹ کیا، جبکہ صائم ایوب، محمد نواز اور محمد ابرار نے دو، دو وکٹیں حاصل کیں۔
شاہین آفریدی نے ایک وکٹ حاصل کی۔
نیدرلینڈ کے کپتان اسکاٹ ایڈورڈز 37 رنز کے ساتھ ٹاپ اسکورر رہے۔ٹاس کے بعد کپتان سلمان علی آغا نے کہا کہ سری لنکا کی پچ پہلی بار دیکھی اور ٹیم کے تین فاسٹ بولرز کے ساتھ پلان پر عمل کرنے کی کوشش کریں گے۔
پاکستان کی الیون میں بابر اعظم، عثمان خان، شاداب خان، فہیم اشرف، صائم ایوب اور دیگر اہم کھلاڑی شامل ہیں۔نیدرلینڈ کے کپتان اسکاٹ ایڈورڈز نے کہا کہ میچ ان کے لیے بہت اہم ہے اور تمام چار گروپ میچز فیصلہ کن ثابت ہوں گے۔ٹی20 ورلڈ کپ میں کل 20 ٹیمیں حصہ لے رہی ہیں، جو چار گروپس میں تقسیم کی گئی ہیں۔
افتتاحی دن کے دوران تین میچز شیڈول ہیں۔ اس روز پاکستان اور نیدرلینڈ کے میچ کے علاوہ ویسٹ انڈیز اسکاٹ لینڈ سے اور بھارت امریکہ کے خلاف میدان میں اترے گا۔ بارش کی پیشگوئی کے پیش نظر ٹاس اور کھیل کی حکمت عملی اہم کردار ادا کرے گی۔