کیف (پاک ترک نیوز )یوکرین کی وزارت دفاع نے انکشاف کیا ہے کہ سویڈن سے ملنے والا ساب 340 اے ڈبلیو، جسے اے ایس سی 890 بھی کہا جاتا ہے، مارچ 2026 سے یوکرینی فضائیہ میں آپریشنل ہے۔یوکرینی وزارت دفاع نے 4 ستمبر 2026 کو جاری رپورٹ میں بتایا کہ یہ طیارہ یوکرین اور اس کے مغربی اتحادیوں کے ایئر فورس کیپبلیٹی کولیشن کے تحت فراہم کی جانے والی صلاحیتوں کا حصہ ہے۔سویڈن نے مئی 2024 میں یوکرین کو دو ساب 340 اے ڈبلیو طیارے دینے کا اعلان کیا تھا، جبکہ بعد کی سرکاری دستاویزات میں بھی دو اے ایس سی 890 طیاروں کی فراہمی کی تصدیق کی گئی۔
رپورٹ کے مطابق یوکرین کی آزادی کے گزشتہ 34 برسوں کے دوران یوکرینی مسلح افواج کے پاس اپنا کوئی مخصوص ایئر بورن ارلی وارننگ اینڈ کنٹرول، اے ای ڈبلیو اینڈ سی طیارہ موجود نہیں تھا۔ساب 340 اے ڈبلیو طیارہ جنگی طیاروں کو فضائی میدان کی صورتحال سے متعلق اہم معلومات فراہم کرسکتا ہے۔ یوکرینی وزارت دفاع کے مطابق اس طیارے سے حاصل ہونے والی معلومات کو ایف 16، میراج 2000 اور مستقبل میں جے اے ایس 39 گرپین لڑاکا طیارے بھی استعمال کرسکیں گے۔
یہ بھی پڑھیں: روس نے 32 راسویٹ سیٹلائٹس خلا میں بھیج دیے، یوکرینی انٹیلی جنس چیف کا دعویٰ
رپورٹ میں اس بات کی نشاندہی بھی کی گئی ہے کہ سوویت دور کے مگ 29 اور ایس یو 27 طیاروں کے ساتھ اس سویڈش اے ڈبلیو اے سی طیارے کی براہِ راست انٹیگریشن مغربی ساختہ جنگی طیاروں جیسی نہیں ہے۔ساب 340 اے ڈبلیو مختلف اقسام کے اہداف کو تقریباً 100 سے 400 کلومیٹر تک کے فاصلے سے شناخت کرسکتا ہے، جبکہ طیارہ مسلسل پانچ گھنٹے تک فضائی گشت کرنے کی صلاحیت رکھتا ہے۔یوکرین کے لیے یہ صلاحیت اس لیے بھی اہم ہے کہ اے ڈبلیو اے سی طیارہ فضائی نگرانی، دشمن کے اہداف کی نشاندہی اور اپنے جنگی طیاروں کو صورتحال سے متعلق معلومات فراہم کرنے میں اہم کردار ادا کرسکتا ہے۔
