کراچی ( پاک ترک نیوز) سینئر وزیر سندھ شرجیل انعام میمن کی زیر صدارت محکمہ ٹرانسپورٹ کا اجلاس ہوا، جس میں عوامی سفری سہولیات میں مزید توسیع کا فیصلہ کیا گیا۔اجلاس میں پیپلز بس سروس کی توسیع، ڈبل ڈیکر بسز، ای وی ٹیکسی سروس، پنک اسکوٹیز اور بی آر ٹی منصوبوں پر پیش رفت کا جائزہ لیا گیا۔اجلاس میں سیکریٹری ٹرانسپورٹ اسد ضامن، سی ای او ٹرانس کراچی زبیر چنہ، ایم ڈی سندھ ماس ٹرانزٹ اتھارٹی بہزاد میمن اور دیگر متعلقہ افسران شریک ہوئے۔
شرجیل انعام میمن کو صوبے میں پیپلز بس سروس کے جاری آپریشنز اور مختلف شہروں تک سروس کی توسیع کے حوالے سے بریفنگ دی گئی۔ حکام نے بتایا کہ قمبر شہدادکوٹ تا لاڑکانہ روٹ پر پیپلز بس سروس جلد شروع کی جا رہی ہے، جبکہ بسیں لاڑکانہ پہنچ چکی ہیں۔اجلاس میں ڈبل ڈیکر بسوں کی آمد اور انہیں آپریشنل کرنے کے معاملات کو بھی حتمی شکل دینے پر بریفنگ دی گئی۔ای وی ٹیکسی سروس کے آپریشنل ماڈل اور سروس کے آغاز کے لیے کیے جانے والے اقدامات پر بھی تفصیلی گفتگو ہوئی۔
شرجیل انعام میمن نے ہدایت کی کہ نئے روٹس پر بس سروس کے آغاز کے لیے تمام انتظامات بروقت مکمل کیے جائیں۔ ان کا کہنا تھا کہ پیپلز بس سروس کا دائرہ کار بڑھانے کا مقصد عوام کو بہتر سفری سہولت فراہم کرنا ہے۔سینئر وزیر نے بتایا کہ 5 ستمبر کو میرپورخاص میں پنک اسکوٹیز تقسیم کی جائیں گی۔ ان کے مطابق خواتین کو بااختیار بنانے اور ضروری سرگرمیوں تک آسان رسائی کے لیے پنک اسکوٹیز پروگرام ایک انقلابی قدم ہے۔شرجیل انعام میمن نے بی آر ٹی منصوبوں پر کام کی رفتار مزید تیز کرنے کی ہدایت کرتے ہوئے کہا کہ غیر ضروری تاخیر سے بچنے کے لیے تمام متعلقہ ادارے باہمی رابطے کے ساتھ کام کریں۔
یہ بھی پڑھیں: لندن پھر سیاسی سرگرمیوں کا مرکز ،اعظم نذیر تارڑ کی صدر زرداری سے ملاقات ،28ویں ترمیم پر مشاورت
انہوں نے کہا کہ سندھ حکومت صوبے میں جدید، محفوظ اور ماحول دوست پبلک ٹرانسپورٹ نظام کے لیے عملی اقدامات کر رہی ہے۔ پیپلز بس سروس کی مختلف شہروں تک توسیع، الیکٹرک ٹرانسپورٹ کا فروغ اور بڑے بی آر ٹی منصوبے جامع ٹرانسپورٹ پالیسی کا حصہ ہیں۔
