اسلام آباد ( پاک ترک نیوز) سیکیورٹیز اینڈ ایکسچینج کمیشن آف پاکستان (ایس ای سی پی) نے پاکستان کی کیپٹل مارکیٹ میں سرمایہ کاروں کے لیے متحدہ ڈیجیٹل آن بورڈنگ فریم ورک متعارف کرا دیا۔نئے فریم ورک کا مقصد سرمایہ کاری کے عمل کو تیز اور آسان بنانا، بار بار ہونے والی تصدیق ختم کرنا، دستاویزات کا عمل سادہ بنانا اور سرمایہ کار اکاؤنٹس کھولنے کے لیے واضح مدت مقرر کرنا ہے۔ایس ای سی پی کے مطابق نئے نظام کے تحت سہولت اکاؤنٹس ایک کاروباری دن جبکہ عام سرمایہ کاری اکاؤنٹس دو کاروباری دنوں میں کھولنے کی کوشش کی جائے گی۔
درخواست گزاروں کو ٹریکنگ آئی ڈی فراہم کی جائے گی، جبکہ کسی دستاویز یا معلومات میں کمی کی صورت میں مقررہ وقت کے اندر آگاہ کیا جائے گا۔ درخواست مسترد ہونے کی صورت میں اس کی وجوہات بھی تحریری طور پر فراہم کی جائیں گی۔ایس ای سی پی کے مطابق نئے فریم ورک کے ذریعے سیکیورٹیز بروکرز، اثاثہ جاتی انتظامی کمپنیوں، انشورنس کمپنیوں اور دیگر ریگولیٹڈ مالیاتی اداروں کے لیے سرمایہ کاروں کی آن بورڈنگ کا طریقہ کار یکساں بنایا گیا ہے۔
نئے نظام کی اہم خصوصیت بار بار صارف کی تصدیق کے عمل کا خاتمہ ہے۔ اگر کسی منظور شدہ مالیاتی ادارے یا متعلقہ تیسرے فریق کے ذریعے سرمایہ کار کی تصدیق پہلے ہی مکمل ہوچکی ہو تو دوبارہ تصدیق کی ضرورت نہیں ہوگی۔ایس ای سی پی کے مطابق اے پی آئی پر مبنی ڈیجیٹل پراسیسنگ کے ذریعے فوری یو آئی این جاری کرنے اور سی ڈی سی سب اکاؤنٹس کھولنے کی سہولت بھی فراہم کی جائے گی، جس سے کاغذی کارروائی اور دستی مداخلت میں کمی آئے گی۔
یہ بھی پڑھیں: پنجاب کو جدید ٹیکنالوجی اور ڈیجیٹل معیشت کا مرکز بنانا چاہتے ہیں، مریم نواز
ایس ای سی پی کے چیئرمین ڈاکٹر کبیر احمد صدیقی کے مطابق مقصد سرمایہ کاری میں موجود رکاوٹیں ختم کرکے نوجوانوں سمیت زیادہ سے زیادہ پاکستانیوں کو کیپٹل مارکیٹ سے جوڑنا ہے۔ایس ای سی پی نے ملک میں کیپٹل مارکیٹ کے سرمایہ کاروں کی تعداد 25 لاکھ تک بڑھانے کا ہدف مقرر کیا ہے۔
