اسلام آباد ( پاک ترک نیوز) پاکستان نے امریکا اور ایران کے درمیان کشیدگی کے خاتمے کے لیے مذاکرات اور سفارت کاری پر زور دیتے ہوئے خبردار کیا ہے کہ مشرق وسطیٰ کی سکیورٹی صورتحال ایک بار پھر غیر یقینی ہو چکی ہے اور تنازع کو خطے کے دیگر حصوں تک پھیلنے سے روکنا ضروری ہے۔
ہفتہ وار پریس بریفنگ میں ترجمان دفتر خارجہ طاہر حسین اندرابی نے کہا کہ چند روز کے امن کے باوجود مشرق وسطیٰ میں سکیورٹی صورتحال دوبارہ تشویشناک ہو گئی ہے۔ ان کا کہنا تھا کہ فریقین کے درمیان رابطے جاری ہیں اور انہیں اسلام آباد معاہدے اور قطر اعلامیے کے دائرہ کار میں لانے کی کوشش کی جا رہی ہے۔ انہوں نے کہا کہ سفارت کاری ہی اس بحران کا واحد مؤثر راستہ ہے اور امریکا اور ایران کی کشیدگی کو خطے کے دیگر ممالک تک نہیں پھیلنا چاہیے۔
ترجمان نے سعودی عرب پر غیر ریاستی عناصر کے حملوں کی شدید مذمت کرتے ہوئے کہا کہ پاکستان غزہ کی بگڑتی ہوئی صورتحال پر بھی گہری تشویش رکھتا ہے۔ انہوں نے ایک سوال کے جواب میں کہا کہ اس معاملے پر پاکستان سعودی عرب کے مؤقف کو دیکھے گا، جبکہ انہیں اس بارے میں علم نہیں کہ عراق نے کوئی باضابطہ بیان جاری کیا ہے یا نہیں۔
بھارت کی جانب سے پاکستانی ٹی وی، ڈیجیٹل اور سوشل میڈیا اکاؤنٹس تک رسائی محدود کرنے پر ترجمان نے کہا کہ یہ اقدام مضحکہ خیز ہے۔ ان کے مطابق بھارت حقائق پر مبنی رپورٹنگ کے لیے گنجائش ختم کر چکا ہے اور آزاد آوازوں کو دبانے کے لیے پابندیوں اور جابرانہ اقدامات پر انحصار کر رہا ہے۔ انہوں نے عالمی میڈیا اور صحافتی تنظیموں سے مطالبہ کیا کہ وہ بھارت میں اظہارِ رائے کی آزادی پر عائد قدغنوں کا نوٹس لیں۔
یہ بھی پڑھیں: بے گناہ قید کا صدمہ خاتون کی جان لے گیا
ترجمان دفتر خارجہ نے جرمن نشریاتی ادارے کی پاکستان کے جوہری پروگرام سے متعلق دستاویزی فلم کو بھی مسترد کرتے ہوئے کہا کہ اس میں جان بوجھ کر گمراہ کن تاثر دینے اور پاکستان کے جوہری پروگرام کے بارے میں غلط فہمیاں پیدا کرنے کی کوشش کی گئی ہے۔ انہوں نے کہا کہ پاکستان کو اپنے جامع جوہری کمانڈ اینڈ کنٹرول نظام پر مکمل اعتماد ہے، جو عالمی معیار کے مطابق ہے۔
انہوں نے مزید بتایا کہ پاکستان اور کویت کے درمیان دفاعی تعاون کا معاہدہ جون 2023 میں طے پایا تھا، جبکہ کویت نے اب اس معاہدے کی باضابطہ توثیق بھی مکمل کر دی ہے۔ ان کے مطابق یہ پیش رفت دونوں ممالک کے درمیان چار دہائیوں پر محیط مضبوط دفاعی تعلقات کا تسلسل ہے۔
