اسلام آباد( پاک ترک نیوز) پاکستان نے ممکنہ عازمینِ حج کو عمومی تاریخ سے پہلے اپنے پاسپورٹ کی تجدید کروانے کی اجازت دے دی ہے تاکہ وہ حج 2027 کی اہلیت کے تقاضے پورے کرسکیں۔
وزارت نےاپنے حالیہ بیان میں کہا ہے کہ حج 2027 کے درخواست دہندگان کے پاس پاکستانی پاسپورٹ ہونا ضروری ہے جو کم از کم 16 نومبر 2027 تک کارآمد ہو۔ اگرچہ پاسپورٹ کی تجدید عموماً اس کی میعاد ختم ہونے کی تاریخ کے قریب ہوتی ہے لیکن وزارت نے کہا ہے کہ اگر ممکنہ عازمینِ حج کے پاسپورٹ ضابطہ تین(سی) پر پورا نہیں اترتے تو وہ ان کی جلد تجدید کروا سکتے ہیں۔
اس اقدام کا مقصد ہے کہ حج 2027 کی درخواستوں پر کارروائی کے دوران درخواست دہندگان کو تکنیکی بنیادوں پر نااہل ہونے سے بچانا ہے۔
وزارت نے کہا ہے کہ وزارت داخلہ کے ذریعےپاسپورٹ آفس کو ہدایات جاری کی گئی ہیں کہ ممکنہ عازمینِ حج کو مقررہ مدت سے پہلے اپنے پاسپورٹ کی تجدید کروانے کی اجازت دی جائے۔
یہ بھی پڑھیں: پاکستان میں حج سیونگ اسکیم متعارف کرانے کی تیاریاں جاری
پاکستان نے حالیہ برسوں میں حج انتظامات کو ڈیجیٹائز اور ہموار کرنے کی غرض سے آن لائن رجسٹریشن اور ادائیگی کا طریقہ کار متعارف کروایا ہے اور مستقبل کے لیے طویل مدتی منصوبہ بندی اختیار کی ہے۔
سعودی عرب ویزا درخواستوں پر کارروائی کرنے سے پہلے عازمین حج سے سختی سے تقاضہ کرتا ہے کہ سفر پر روانہ ہوتے وقت انکے پاسپو رٹ اگلے کم از کم چھ ماہ کے لئے قابل استعمال ہوں۔اور تمام سفری دستاویزات سمیت سفری لوازمات پورے ہوں۔
