اسلام آباد( پاک ترک نیوز) حج 2027 کے لیے پاکستان میں سرکاری سطح پر تیاریوں کے آغاز کے ساتھ ساتھ نجی شعبے کی حج کمپنیاںیا حج آپریٹرز بھی متحرک ہو رہی ہیں۔ وزارت مذہبی امور کے مطابق حج 2027 کے لیے اب تک 100 سے زائد پرائیویٹ حج آپریٹرز نے حج آپریشن کا حصہ بننے کی غرض سے حصول لائسنس کے لیے درخواستیں دی ہیں۔ وزارت مذہبی امور پہلے ہی 25 پرائیویٹ حج آپریٹرز کو لائسنس جاری کر چکی ہے۔ تاہم وزارت کا خیال تھا کہ مزید پرائیویٹ آپریٹرز کو شریک کیا جانا چاہیے۔ تاکہ مسابقت کے ماحول کی وجہ سے عازمین حج کو بہتر سہولیات کی فراہمی زیادہ ہو ۔ نیز تھوڑی تعداد میں نجی حج آپریٹرز زیادہ تعداد میں حاجیوں کو لے جانے کی وجہ سے زیادہ کام کے بوجھ تلے نہ آئیں۔
رواں سال طے کی گئی حج پالیسی کے مطابق مجموعی طور پر 71648 عازمین حج پرائیویٹ آپریٹرز کے توسط سے حج 2027 کے لیے جا سکیں گے۔ جبکہ پاکستان کے کل حج کوٹے کی تعداد 179210 میں سے بقیہ107562عازمین حج سرکاری حج سکیم سے مستفید ہو سکیں گے۔
وزارت مذہبی امور کے مطابق ہر نجی حج آپریٹرکو زیادہ سے زیادہ 3000 عازمین کو حج پر لے جانے کا کوٹہ مختص کیا گیا ہے۔ حکومت کی کوشش ہے کہ حج آپریٹرز کی تعداد نجی شعبے سے بے شک کم ہو لیکن مالی اعتبار سے اور اپنے حاجیوں کو آفر کی جانے والی سروسز اور سہولیات کے معیار کے حوالے سے مستحکم اور بہترین ہوں۔
یہ بھی پڑھیں: حج کے لیے سعودی عرب میں نئی رہائشی شرائط
پرائیویٹ حج آپریٹرز کی طرف سے لائسنس کی درخواستوں کا جائزہ لینے کے لیے وزارت مذہبی امور نے ایک کمیٹی قائم کر دی ہے جو ان درخواستوں کا جائزہ لے کر فیصلہ کرے گی۔ کہ لائسنس کے لیے شرائط پر کون سی کمپنی پورا اترتی ہے۔ خیال رہے وزارت نے ان کمپنیوں کی آن لائن پورٹل پر درخواستیں وصول کرنے کا اہتمام کیا تھا۔
