اسلام آباد ( پاک ترک نیوز)حکومت نے حج 2027 کے سرکاری پیکیجز کی قیمتیں مقرر کر دیں۔
تفصیلات کےمطابق حج 2027 کے پیکیجز کی قیمت مقررکردی گئیں،ریگولر حج پیکیج کی لاگت 12لاکھ روپے، ادائیگیاں ڈیجیٹل ہوں گی۔
حج کے 40 سے 42 روزہ ریگولر پیکیج کی لاگت 12 لاکھ روپے جبکہ 20 سے 22 روزہ مختصر پیکیج کی قیمت 13 لاکھ روپے مقرر کی گئی ہے۔
وفاقی وزیر مذہبی امور سردار محمد یوسف کے مطابق حج 2027 کے لیے درخواست، ادائیگی اور دیگر تمام مراحل کو ڈیجیٹل بنایا جا رہا ہے۔
حجاج کرام حج سے متعلق تمام امور پاک حج موبائل ایپ کے ذریعے انجام دے سکیں گے۔
حج اخراجات کی پہلی قسط 17 اگست سے وصول کی جائے گی جبکہ دوسری قسط اکتوبر کے دوسرے ہفتے میں جمع کرانا ہوگی۔
حکومتی حج اسکیم کے تحت مختصر دورانیے کے پیکیج کے لیے 30 ہزار نشستیں مختص کی گئی ہیں۔
وفاقی وزیر کے مطابق تقریباً 4 لاکھ رجسٹرڈ عازمین اس وقت درخواست کے عمل میں شامل ہیں۔ 2027 میں حج کی سعادت حاصل نہ کر سکنے والے عازمین کو آئندہ سال کے لیے انتظار کی فہرست میں شامل کیا جائے گا۔
حج ادائیگیوں کے لیے حبیب بینک کو وزارت مذہبی امور کا مجاز بینک مقرر کیا گیا ہے۔ وزارت مذہبی امور اور حبیب بینک اسلامک کے درمیان معاہدے پر دستخط بھی کیے جائیں گے۔
سردار محمد یوسف نے کہا کہ وزارت نے تمام بینکوں کو عمل میں شرکت کی دعوت دی تھی، تاہم مطلوبہ معیار، خصوصاً ڈیجیٹل ادائیگی کی سہولت کے حوالے سے صرف حبیب بینک ہی مقررہ شرائط پر پورا اترا۔
حج کے لیے ڈیجیٹل ادائیگی کا نظام پرائیویٹ حج اسکیم پر بھی لاگو ہوگا۔
یہ بھی پڑھیں: برج خلیفہ کا ریکارڈ خطرے میں،سعودی عرب میں ایک کلومیٹر بلند ٹاور کی تیاری
پرائیویٹ اسکیم کے عازمین ڈیجیٹل پلیٹ فارم پر منظور شدہ کمپنیوں میں سے اپنی پسند کے سروس فراہم کنندہ کا انتخاب کر سکیں گے۔
حبیب بینک اسلامک کے سربراہ اسد خان کے مطابق ملک بھر میں بینک کی 99 فیصد برانچز حج ادائیگیوں کے لیے ڈیجیٹل سہولت فراہم کریں گی، جبکہ کریڈٹ اور ڈیبٹ کارڈز کے ذریعے بھی ادائیگی کی جا سکے گی۔
