اسلام آباد ( پاک ترک نیوز) وزیراعظم محمد شہباز شریف نے بانیِ پاکستان قائداعظم محمد علی جناحؒ کے یومِ وفات پر اپنے پیغام میں انہیں زبردست خراجِ عقیدت پیش کرتے ہوئے کہا ہے کہ پوری قوم اپنے عظیم رہبر کی بصیرت افروز قیادت، سیاسی حکمت عملی اور بے لوث قومی رہنمائی کو سلام پیش کرتی ہے۔وزیراعظم شہباز شریف نے کہا کہ قائداعظم محمد علی جناحؒ دنیا کے ان ممتاز رہنماؤں میں شامل ہیں جنہوں نے تاریخ کا دھارا موڑتے ہوئے انتہائی نامساعد حالات میں برصغیر کے مسلمانوں کے لیے ایک آزاد مملکت کی راہ ہموار کی۔
ان کا کہنا تھا کہ قائداعظم نے مسلمانوں کو اپنی مذہبی، تہذیبی اور نظریاتی شناخت کے تحفظ کے لیے متحد ہوکر جدوجہد کرنے کا عزم اور حوصلہ دیا۔ قائداعظم کی سیاسی بصیرت، دوراندیشی اور بہترین قیادت کے باعث تحریکِ آزادی کامیابی سے ہمکنار ہوئی۔وزیراعظم نے کہا کہ بابائے قوم کی بصیرت سے مسلمانوں کی نظریاتی آزادی، سیاسی و مذہبی حقوق اور معاشی و معاشرتی ترقی کے ضامن آزاد مملکت کا خواب پاکستان کی صورت میں حقیقت بنا۔شہباز شریف کے مطابق قائداعظم نے نوزائیدہ مملکت کو درپیش کٹھن انتظامی اور مالیاتی مسائل، لاکھوں افراد کی نقل مکانی اور نظامِ حکومت چلانے جیسے تمام چیلنجز کا مدبرانہ اور پُراعتماد انداز میں سامنا کیا۔
یہ بھی پڑھیں: سائبر فراڈ کے خطرناک وار، 3 سال میں 2 لاکھ 27 ہزار سے زائد شہری لٹ گئے
وزیراعظم نے کہا کہ قائداعظم نے واضح کیا تھا کہ ریاستِ پاکستان کی بنیاد اسلامی اصولوں پر قائم ہے، یہ اصول بلا تفریقِ رنگ و نسل شہری اور مذہبی آزادی، یکساں بنیادی حقوق اور فرائض پر مبنی ہیں۔انہوں نے کہا کہ پاکستان کو ایک ترقی یافتہ اور فلاحی ریاست بنانا قائداعظم کی سیاسی میراث کا بنیادی مقصد ہے، جبکہ ملک کی ترقی، خوشحالی اور عوام کی فلاح و بہبود پوری قوم کی مشترکہ اور اجتماعی کوششوں سے ہی ممکن ہے۔وزیراعظم شہباز شریف نے کہا کہ آج کا دن اس بات کا تقاضا کرتا ہے کہ قوم قائداعظم کے رہنما اصولوں پر کاربند رہنے کے عزم کی تجدید کرے۔ ایمان، اتحاد اور نظم و ضبط سے غیر متزلزل وابستگی آئندہ نسلوں کی تعلیم و تربیت اور روشن قومی مستقبل کے لیے مشعلِ راہ ہے۔انہوں نے کہا کہ قائداعظم کی میراث کو خراجِ عقیدت پیش کرنے کا بہترین طریقہ قومی یکجہتی، معاشرتی ہم آہنگی اور معاشی استحکام کے فروغ کے لیے مل کر کام کرنا ہے۔
وزیراعظم نے عزم ظاہر کیا کہ آنے والی نسلوں کو ایسا پاکستان ورثے میں دیا جائے گا جو عظیم قائد کے افکار و نظریات کا حقیقی آئینہ دار ہو۔اپنے پیغام کے آخر میں وزیراعظم شہباز شریف نے کہا کہ آج پوری قوم بانیِ پاکستان قائداعظم محمد علی جناحؒ کے بلندیِ درجات کے لیے دعا گو ہے۔ اللہ تعالیٰ قائداعظم کو اپنی جوارِ رحمت میں بلند درجات عطا فرمائے۔
