اسلام آباد ( پاک ترک نیوز) وفاقی حکومت نے پٹرولیم مصنوعات کی قیمتوں میں ایک بار پھر اضافہ کر دیا ہے، جس کے بعد پٹرول اور ہائی اسپیڈ ڈیزل کی نئی قیمتوں کا اطلاق فوری طور پر کر دیا گیا ہے۔
جاری کردہ نوٹیفکیشن کے مطابق پٹرول کی فی لٹر قیمت میں ایک روپیہ 9 پیسے اضافہ کیا گیا ہے، جس کے بعد پٹرول کی نئی قیمت 336 روپے 15 پیسے فی لٹر مقرر کر دی گئی ہے۔
اسی طرح ہائی اسپیڈ ڈیزل کی قیمت میں 2 روپے 42 پیسے فی لٹر اضافہ کیا گیا ہے، جس کے بعد ڈیزل کی نئی قیمت 393 روپے 4 پیسے فی لٹر ہو گئی ہے۔
حکومت کی جانب سے قیمتوں میں اضافے کی وجہ عالمی منڈی میں خام تیل کی قیمتوں میں اتار چڑھاؤ اور درآمدی لاگت میں اضافے کو قرار دیا جا رہا ہے۔ نئی قیمتوں کا اطلاق آج سے ملک بھر میں ہو گیا ہے۔
یہ بھی پڑھیں: ورک لوڈ مینجمنٹ وقت کی ضرورت، اپنی کارکردگی سے مطمئن نہیں: نسیم شاہ
پٹرولیم مصنوعات مہنگی ہونے کے بعد ٹرانسپورٹ، زرعی شعبے اور اشیائے ضروریہ کی ترسیل کے اخراجات میں اضافے کا خدشہ ظاہر کیا جا رہا ہے، جس کے باعث آئندہ دنوں میں مہنگائی کی نئی لہر آنے کا امکان بھی ہے۔ عوامی حلقوں نے قیمتوں میں مسلسل اضافے پر تشویش کا اظہار کرتے ہوئے حکومت سے ریلیف فراہم کرنے کا مطالبہ کیا ہے۔
