نیو یارک ( پاک ترک نیوز) عراق کی قومی فٹبال ٹیم کے مڈفیلڈر اور سابق مانچسٹر یونائیٹڈ اکیڈمی کے کھلاڑی زیدان اقبال مردوں کے فٹبال ورلڈ کپ میں ایک منفرد تاریخ رقم کرنے کے قریب ہیں۔
اگر زیدان اقبال ورلڈ کپ میں عراق کی جانب سے میدان میں اترتے ہیں تو وہ پاکستانی نژاد پہلے فٹبالر بن جائیں گے جو مردوں کے فیفا ورلڈ کپ میں شرکت کا اعزاز حاصل کریں گے۔
23 سالہ زیدان اقبال انگلینڈ کے شہر مانچسٹر میں پیدا ہوئے۔ ان کے والد پاکستانی جبکہ والدہ عراقی ہیں۔ زیدان نے کہا کہ انہیں اس اعزاز کے بارے میں معلوم ہونے پر خود بھی حیرت ہوئی۔
زیدان اقبال نے کہا کہ مجھے خود بھی معلوم نہیں تھا کہ میں پاکستانی نژاد پہلا کھلاڑی بننے جا رہا ہوں جو ورلڈ کپ میں کھیلے گا۔ جب میں عراق کے ساتھ ورلڈ کپ کوالیفائی کرنے کی کوشش کر رہا تھا تو میں نے اس حوالے سے کبھی نہیں سوچا تھا۔
زیدان اقبال نے کہا ان کے والد پاکستان سے تعلق رکھتے ہیں اور ان کی زندگی اور کیریئر میں سب سے اہم شخصیت ہیں۔ وہ اپنے خاندان کے دونوں پس منظر پر فخر کرتے ہیں اور دونوں ممالک کے ساتھ یکساں وابستگی محسوس کرتے ہیں۔ان کی کامیابی نوجوانوں، خصوصاً جنوبی ایشیائی پس منظر رکھنے والے بچوں کے لیے ایک مثال بنے گی۔
انہوں نے کہا کہ ’فٹبال میں کامیابی آسان نہیں ہوتی، اس کے لیے سخت محنت، عزم اور مستقل مزاجی درکار ہوتی ہے۔ میں چاہتا ہوں کہ نوجوان یہ دیکھیں کہ کسی بھی پس منظر، علاقے یا مذہب سے تعلق رکھنے والا فرد محنت کے ذریعے عالمی سطح تک پہنچ سکتا ہے۔‘‘
دوسری جانب پاکستانی فٹبال شائقین بھی زیدان اقبال کی کامیابی پر خوش ہیں۔ پاکستانی فٹبال ٹیلنٹس کے بانی احمد شہزاد کا کہنا ہے کہ پاکستان میں تقریباً ہر فٹبال مداح زیدان اقبال کو جانتا ہے اور ان کی کامیابی نوجوان کھلاڑیوں کے لیے بڑی تحریک ہے۔
یہ بھی پڑھیں: فٹبال پلیئر لیونل میسی کا نیا ریکارڈ
احمد شہزاد کا کہنا تھا کہ ورلڈ کپ میں زیدان اقبال کی موجودگی کے باعث بہت سے پاکستانی شائقین عراق کی حمایت کریں گے اور چاہتے ہیں کہ عراقی ٹیم ٹورنامنٹ میں زیادہ سے زیادہ آگے جائے۔
یاد رہے کہ پاکستان فیفا رینکنگ میں 198 ویں نمبر پر موجود ہے اب تک کبھی فٹبال ورلڈ کپ کے لیے کوالیفائی نہیں کر سکا، تاہم زیدان اقبال کی ممکنہ شرکت پاکستانی فٹبال شائقین کے لیے ایک تاریخی اور یادگار لمحہ ثابت ہو سکتی ہے۔
