اسلام آباد ( پاک ترک نیوز) حکومت نے بڑھتی ہوئی توانائی کی طلب پوری کرنے کے لیے اہم فیصلہ کرتے ہوئے تین قطری طویل المدتی معاہدوں کے تحت ایل این جی کارگو اور ایک اضافی اسپاٹ مارکیٹ کارگو حاصل کر لیا ہے۔
حکام کے مطابق تین کارگو قطر کے ساتھ طویل المدتی معاہدوں کے تحت حاصل کیے گئے ،ایک اضافی کارگو اسپاٹ مارکیٹ سے خریدا گیا ،کارگو کی ترسیل آج اور کل ہو گی ،ایل این جی کارگو پورٹ قاسم پر اتارے جائین گے۔
حکام کے مطابق پاور سیکٹر کی طلب میں تیزی سے اضافہ ہو رہا ہے، جس کے باعث اضافی گیس درآمد کرنا ناگزیر ہو گیا ہے۔
ادھر پٹرولیم ڈویژن کے مطابق مقامی گیس پاور پلانٹس کو 200 روپے فی ایم ایم بی ٹی یو سبسڈی نرخ پر دی جا رہی ہے جبکہ بین الاقوامی قیمت تقریباً 3500 روپے فی ایم ایم بی ٹی یو تک ہے ۔
پٹرولیم حکام کا کہناہے مہنگی درآمدی ایل این جی کے بجائے مقامی گیس کو پاور پلانٹس کی طرف منتقل کیا جا رہا ہے ۔اس اقدام سے زرمبادلہ کے دباؤ میں کمی آئے گی۔
