لاہور( پاک تر ک نیوز) وزیراعلیٰ پنجاب مریم نواز شریف کی زیر صدارت ستھرا پنجاب کے حوالے سے خصوصی جائزہ اجلاس ہوا، جس میں صوبے بھر میں صفائی کے نظام کو مزید مؤثر بنانے اور شہریوں کو صاف ستھرا ماحول فراہم کرنے کے لیے متعدد اہم فیصلے کیے گئے۔
وزیراعلیٰ مریم نواز شریف نے مارکیٹوں، بازاروں اور کمرشل علاقوں میں یکساں طرز کی ڈسٹ بن اور گاربیج بیگ استعمال کرنے کا حکم دیا، جبکہ کمرشل علاقوں سے کچرا اٹھانے کے لیے باقاعدہ اوقات کار مقرر کرنے کی ہدایت کی۔
انہوں نے صبح 5 بجے مرکزی شاہراہوں کی دھلائی اور صفائی یقینی بنانے کا حکم دیتے ہوئے مختلف علاقوں میں موجود خالی پلاٹوں کی صفائی کی بھی ہدایت کی۔
وزیراعلیٰ نے ستھرا پنجاب کے ورکرز کو ہر ماہ کی 5 تاریخ تک تنخواہوں کی ادائیگی یقینی بنانے کا حکم دیا اور ستھرا پنجاب کمپنیوں سے ورکرز کو ماہانہ ادائیگی کی رپورٹ طلب کرلی۔ انہوں نے کنٹریکٹرز کی واجب الادا رقوم بھی جلد از جلد ادا کرنے کی ہدایت کی۔
وزیراعلیٰ نے علاقائی ضروریات کے مطابق صفائی ورکرز اور مکینیکل مشینری کی کمی پوری کرنے کی ہدایت کرتے ہوئے کہا کہ سکولوں، کالجوں، یونیورسٹیوں اور ہسپتالوں کے گرد و نواح میں خصوصی طور پر صفائی یقینی بنائی جائے۔
انہوں نے پارکس اور گرین بیلٹس کی صفائی، خالی منرل واٹر بوتلوں، جوس کے ڈبوں اور دیگر کچرے کو بروقت ہٹانے کی بھی ہدایت کی۔ ریلوے ٹریک کے اطراف شہری علاقوں میں صفائی کے لیے اقدامات اور شہروں کے داخلی و خارجی راستوں کی روزانہ بروقت صفائی یقینی بنانے کا حکم دیا گیا۔
وزیراعلیٰ نے ڈپٹی کمشنرز کو متعلقہ کنٹریکٹرز اور ایم ڈی واساز سے مسلسل رابطے اور ملاقاتیں کرنے کی ہدایت کی۔ فیلڈ مانیٹرنگ افسران کے لیے یکساں یونیفارم اور موٹر سائیکلوں کی برانڈنگ کا بھی فیصلہ کیا گیا۔
مریم نواز شریف نے کہا کہ ستھرا پنجاب میں ورکرز سے افسران تک ہر سطح پر کارکردگی جانچنے کے لیے واضح ایس او پیز تشکیل دیے جائیں۔ شہروں کی سبزی اور فروٹ منڈیوں کی صفائی پر خصوصی توجہ دی جائے۔وزیراعلیٰ نے واضح کیا کہ ایس او پیز کی خلاف ورزی پر کنٹریکٹرز کو جرمانہ کرنے سے پہلے 24 گھنٹے میں بہتری لانے کا موقع دیا جائے۔ ان کا کہنا تھا کہ جرمانہ کرنا حکومت کا مقصد نہیں، اصل مقصد صفائی کے معیار کو یقینی بنانا ہے۔
مریم نواز شریف نے ستھرا پنجاب میں کام نہ کرنے والوں کے لیے زیرو ٹالرنس پالیسی اپنانے کی ہدایت کرتے ہوئے کہا کہ ستھرا پنجاب کی گاڑیوں، کنٹینرز اور ویسٹ کلیکشن پوائنٹس کی باقاعدگی سے صفائی کی جائے۔
وزیراعلیٰ نے کہا کہ صرف شہروں کی مرکزی سڑکوں کی صفائی کافی نہیں، گلی محلوں کی صفائی بھی انتہائی ضروری ہے۔ ان کا کہنا تھا کہ ستھرا پنجاب ان کے دل کے بہت قریب ہے اور مزید بہتر نتائج کے لیے مزید محنت کرنا ہوگی۔
اجلاس میں لاہور، خانیوال، اوکاڑہ، اٹک، قصور اور مری سمیت دیگر علاقوں کی بہتر کارکردگی کو سراہا گیا، جبکہ فیصل آباد، سیالکوٹ، شیخوپورہ اور دیگر علاقوں کو کارکردگی بہتر بنانے کی ہدایت کی گئی۔
وزیراعلیٰ مریم نواز شریف نے احکامات پر عملدرآمد کا جائزہ لینے کے لیے سات روز بعد دوبارہ اجلاس طلب کرلیا۔
