لاہور( پاک ترک نیوز) کیا آپ بھی رات دیر تک جاگتے ہیں؟ کیا صبح اٹھتے ہی تھکن محسوس ہوتی ہے؟ ماہرین کے مطابق نیند کی کمی صرف سستی نہیں بلکہ سنگین بیماریوں کا پیش خیمہ بھی بن سکتی ہے۔
جدید دور کی مصروف زندگی میں جہاں وقت کی کمی ہے، وہیں نیند سب سے زیادہ نظر انداز کی جانے والی ضرورت بن چکی ہے۔ ماہرین کے مطابق روزانہ 7 سے 8 گھنٹے کی نیند نہ لینا جسم اور دماغ دونوں کے لیے نقصان دہ ثابت ہو سکتا ہے۔
طبی ماہرین کا کہنا ہے کہ ایک صحت مند زندگی کے لیے روزانہ مناسب نیند انتہائی ضروری ہے۔ ورلڈ ہیلتھ آرگنائزیشن کے مطابق بالغ افراد کو روزانہ کم از کم 7 سے 9 گھنٹے کی نیند لینا چاہیے۔
بچوں کے لیے نیند کا دورانیہ زیادہ ہوتا ہے،نومولود کے لیے چودہ سے سترہ گھنٹے ،اسکول جانے والے بچوں کے لیےنو سے گیارہ گھنٹے،نوجوانوں کےلیے آٹھ سے دس گھنٹے نیند ضروری ہے
نیند کی کمی ہارمونز کے توازن کو بھی بگاڑ دیتی ہے، جس سے بھوک زیادہ لگتی ہے اور انسان غیر ضروری کھانے کی طرف مائل ہو جاتا ہے۔ نیند کی کمی سے ذہنی دباؤ، کمزور یادداشت، موٹاپا اور دل کی بیماریوں جیسے مسائل پیدا ہو سکتے ہیں۔ نیند پوری نہ ہونے کی وجہ سے ہر وقت تھکن ،چڑچڑاہٹ پن ،کام میں توجہ کی کمی ،مدافعتی نظام کمزور اور حادثات کا خطرہ بڑھ جاتاہے۔
ایک تحقیق کے مطابق مسلسل کم نیند لینے والے افراد میں دل کے امراض اور ذیابیطس کا خطرہ زیادہ ہو جاتا ہے۔بہتر نیند کے لیے احتیاطی تدابیر اختیار کریں ،سونے اور جاگنے کا وقت مقرر کریں ،موبائل فون اور سکرین کا استعمال کم کریں ،چائے اور کافی کا استعمال رات کے وقت مت کریں۔
ماہرین کا کہنا ہے کہ مسلسل کم نیند انسان کو ذہنی دباؤ، ڈپریشن اور بے چینی کا شکار بھی بنا سکتی ہے۔یاد رکھیں۔۔ اچھی نیند صرف آرام نہیں بلکہ صحت مند زندگی کی بنیاد ہے۔ تو آج ہی اپنی نیند کا خیال رکھیں، کیونکہ صحت مند نیند ہی صحت مند کل کی ضمانت ہے۔ماہرین کا کہناہے نیند پوری نہ ہو تو بیماریوں کا خطرہ بڑھ جاتا ہے۔
