اسلام آباد ( پاک ترک نیوز) وفاقی وزیر منصوبہ بندی احسن اقبال نے ملک میں 12 سے 15 نئے صوبے بنانے کی تجویز دے دی۔احسن اقبال کا کہنا ہے کہ موجودہ نظام عوام کو ڈیلیور نہیں کر رہا، انتظامی ڈھانچہ آبادی کے دباؤ کے باعث اوورلوڈڈ ہوچکا ہے، اس لیے انتظامی نظام میں توازن پیدا کرنا ہوگا۔ انہوں نے کہا کہ ہر موجودہ صوبے کو تین حصوں میں تقسیم کیا جانا چاہیے، تاہم نئے صوبوں کے قیام کے لیے سیاسی اتفاقِ رائے ناگزیر ہے۔
احسن اقبال کے مطابق بدین سے گھوٹکی تک پورا سندھ کراچی سے نہیں چلایا جاسکتا، جبکہ رحیم یار خان سے اٹک تک پنجاب کو لاہور سے نہیں چلایا جاسکتا۔انہوں نے تجویز دی کہ خیبرپختونخوا کو ڈی آئی خان سے چترال تک اور بلوچستان کو پسنی سے ژوب اور قلعہ سیف اللہ تک مؤثر انتظامی نظام کے تحت چلایا جائے۔وفاقی وزیر نے کہا کہ حل یہ ہے کہ یا تو 160 بااختیار ضلعی حکومتیں قائم کی جائیں یا ملک میں 12 سے 15 صوبے بنائے جائیں۔
یہ بھی پڑھیں: نئے صوبوں کے معاملے پر سیاسی جماعتوں میں ڈائیلاگ لازمی ہے، حمزہ شہباز
احسن اقبال نے کہا کہ اس معاملے پر جائزہ کمیٹی بنا کر قومی اور سیاسی بحث شروع کی جانی چاہیے، جبکہ عوام کو تعلیم، صحت، صفائی اور صاف پانی کی فراہمی سیاسی نعروں سے زیادہ اہم ہے۔
