اسلام آباد ( پاک ترک نیوز) نیپرا نے بجلی کی پیداوار، ترسیل اور تقسیم کے دوران مختلف خلاف ورزیوں پر بجلی تقسیم کار کمپنیوں کے خلاف بڑی کارروائی کرتے ہوئے گزشتہ تین برسوں میں مجموعی طور پر 2 ارب 90 کروڑ روپے سے زائد کے جرمانے عائد کر دیئے۔
نیپرا کے مطابق جرمانے کے الیکٹرک، پیسکو، گیپکو، حیسکو، لیسکو، سیپکو، فیسکو، آئیسکو اور میپکو پر مختلف نوعیت کی خلاف ورزیوں کے باعث کیے گئے۔ ان خلاف ورزیوں میں حفاظتی اقدامات میں کوتاہی، حادثات کے نتیجے میں انسانی جانوں کا ضیاع، املاک کو نقصان اور لوڈشیڈنگ پالیسی کی خلاف ورزیاں شامل ہیں۔
اعداد و شمار کے مطابق آئیسکو پر سب سے زیادہ 29 کروڑ 50 لاکھ روپے کا جرمانہ عائد کیا گیا، جبکہ حیسکو پر 14 کروڑ روپے، پیسکو پر 11 کروڑ روپے، گیپکو پر 9 کروڑ روپے، لیسکو پر 8 کروڑ روپے اور کے الیکٹرک پر 6 کروڑ روپے کا جرمانہ کیا گیا۔
یہ بھی پڑھیں: امریکا کا جدید جوہری توانائی کی جانب بڑا قدم، 1100میگاواٹ بجلی منصوبے کا آغاز
نیپرا نے مزید بتایا کہ حیسکو کو مالی سال 2025-26 کے دوران لوڈشیڈنگ پالیسی کی خلاف ورزی پر دو سال تک روزانہ ایک لاکھ روپے کے حساب سے اضافی جرمانہ بھی عائد کیا گیا۔
نیپرا کا کہنا ہے کہ ان اقدامات کا مقصد بجلی تقسیم کار کمپنیوں کو حفاظتی معیارات، سروس کے معیار اور ریگولیٹری قوانین پر سختی سے عملدرآمد کا پابند بنانا اور صارفین کے جان و مال کے تحفظ کو یقینی بنانا ہے۔
