کراچی ( پاک ترک نیوز) کراچی کی ایڈیشنل ڈسٹرکٹ اینڈ سیشن عدالت شرقی میں میر رضا قتل کیس کی سماعت ہوئی، جہاں مقتول کے کاروباری شراکت دار احمد اور وینڈر عبداللہ کی درخواست ضمانت پر کارروائی کی گئی۔درخواست گزار احمد، عبداللہ اور تفتیشی افسر عدالت میں پیش ہوئے۔ دوران سماعت درخواست گزاروں کے وکیل خالد ممتاز ایڈووکیٹ نے ضمانت کی درخواست واپس لے لی۔وکیل نے مؤقف اختیار کیا کہ پولیس کے عبوری چالان میں احمد اور عبداللہ کے نام شامل نہیں ہیں۔
عدالت نے تفتیشی افسر سے استفسار کیا کہ کیا واقعی درخواست گزاروں کے نام چالان میں شامل نہیں ہیں؟ تفتیشی افسر نے چالان کی نقول عدالت میں جمع کروا دیں اور تصدیق کی کہ عبوری چالان میں احمد اور عبداللہ کے نام شامل نہیں ہیں۔عدالت نے استفسار کیا کہ مقدمے کے مدعی کہاں ہیں؟ سرکاری وکیل نے بتایا کہ مدعی مقدمہ عدالت میں پیش نہیں ہوئے۔
یہ بھی پڑھیں: وینس فلم فیسٹیول میں غزہ میں بڑے پیمانے پر ہلاکتوں کے لیے مصنوعی ذہانت کے استعمال پر مبنی اسرائیلی فلم کو ریکارڈ داد ملی
عدالت نے ریمارکس دیے کہ ضمانت کی درخواست واپس لینے کی وجوہات عدالتی حکم نامے میں درج نہیں کی جا رہیں۔بعد ازاں عدالت نے احمد اور عبداللہ کی درخواست ضمانت نمٹا دی۔
