لاہور( پاک ترک نیوز) محسن نقوی کی زیرصدارت پاکستان سپر لیگ انتظامیہ اور فرنچائز مالکان کا تفصیلی جائزہ اجلاس منعقد ہوا، جس میں ایچ بی ایل پی ایس ایل 11 کے کامیاب انعقاد کا جائزہ لینے کے ساتھ ساتھ آئندہ سیزن کی تیاریوں پر بھی تفصیلی تبادلہ خیال کیا گیا۔
اجلاس میں شرکا نے ایچ بی ایل پی ایس ایل 11 کے دوران کھیلے گئے 44 میچز میں کرکٹ کے معیار، لیگ کے انتظامی امور اور مختلف تبدیلیوں کا تفصیلی جائزہ لیا۔ اس موقع پر بتایا گیا کہ لیگ کو سوشل میڈیا، اسٹریمنگ پلیٹ فارمز اور ٹیلی ویژن پر ریکارڈ ویورشپ حاصل ہوئی، جسے پی ایس ایل کی مقبولیت میں نمایاں اضافہ قرار دیا گیا۔
اجلاس میں آئندہ سیزن کے لیے ونڈو، پلیئنگ کنڈیشنز، ڈائریکٹ سائننگ، ریٹینشن پالیسی اور دیگر تکنیکی امور پر بھی گفتگو ہوئی۔ شرکا کو آگاہ کیا گیا کہ ان معاملات پر جلد خصوصی ورکشاپس کا انعقاد کیا جائے گا تاکہ تمام فرنچائزز کو آئندہ سیزن کی حکمت عملی کے حوالے سے مکمل رہنمائی فراہم کی جا سکے۔
اجلاس میں شریک فرنچائز مالکان نے مشکل حالات میں ایچ بی ایل پی ایس ایل 11 کے کامیاب انعقاد پر چیئرمین پی سی بی اور ان کی پوری ٹیم کی کاوشوں کو سراہتے ہوئے انہیں خراجِ تحسین پیش کیا۔
یہ بھی پڑھیں: وزیراعظم شہباز شریف سے آذربائیجان کے سفیر کی الوداعی ملاقات
اجلاس میں آف سیزن اور پری سیزن کے دوران شائقین کرکٹ کے لیے مختلف سرگرمیوں کے انعقاد پر بھی غور کیا گیا، جبکہ یہ فیصلہ بھی کیا گیا کہ پی ایس ایل اور تمام آٹھ فرنچائزز کے باہمی اشتراک سے لیگ کا آفیشل مرچنڈائز پلیٹ فارم لانچ کیا جائے گا تاکہ شائقین کو باضابطہ مصنوعات دستیاب ہو سکیں۔
اجلاس میں بتایا گیا کہ ایچ بی ایل پی ایس ایل کی گورننگ کونسل کا اہم اجلاس اگست کے آخری ہفتے میں منعقد ہوگا، جبکہ اجلاس کی تاریخ، وقت اور مقام کا اعلان بعد میں کیا جائے گا۔
اجلاس میں سلمان نصیر، جاوید مرتضیٰ، عثمان واہلہ سمیت پی سی بی اور پی ایس ایل انتظامیہ کے دیگر اعلیٰ حکام نے بھی شرکت کی۔
