اسلام آباد ( پاک ترک نیوز) وزیراعظم شہبازشریف کا کہناہے پاکستان آج اقوام عالم کے ساتھ ہم آواز ہو کر یوم مزدور نہایت پر عزم انداز میں منا رہا ہے۔مزدوروں کے عالمی دن پر دنیا بھر اور بالخصوص پاکستان کے محنت کشں مزدوروں کو ان کی بے لوث خدمات پر خراج تحسین اور سلام پیش کرتا ہوں۔
وزیراعظم نے کہامزدور، کسان، کاریگر، فیکٹریوں میں کام کرنے والے اور دیگر محنت کش طبقات کی قربانی اور خاموش استقامت ہی کھیتوں سے کارخانوں تک، تعمیراتی مقامات سے ورکشاپس تک، مقامی گلیوں سے لے کر عالمی سطح تک کارہاۓ زندگی کو رواں دواں رکھتی ہے۔ معاشرے کے یہی بے لوث جفا کش سب سے بڑے اعزاز کے مستحق ہیں۔
ہم بحیثیت قوم، پاکستانی مزدور کی عزم و ہمت ،مشکلات کو سہنے کا حوصلہ اور زندگی کی سختیوں کا وقار کے ساتھ سامنا کرنے کے مثالی جذبہ کے شاہد ہیں، مزدور اور ہنر مند افرادی قوت ہی اندرون و بیرون ملک ہماری قابلیت، محنت اور پیشہ ورانہ مہارت کے آئینہ دار ہیں۔
وزیراعظم نے کہا سمندر پار ہمارے لاکھوں محنت کش قومی صلاحیت اور ملکی اساس کے سفیر ہیں۔ انکی قابلیت اور محنت سے کمائی گئی ایک ایک پائی ہمارے لئے باعث فخر ہے۔
سمندر پار پاکستانی دنیا بھر میں عزت کے ساتھ روزی کماتے ہیں اورملکی معاشی استحکام میں قیمتی زرمبادلہ کی صورت میں اپنا بیش قدر حصہ ڈالتے ہیں۔ قوم کے مستقبل کے لئے انکی یہ قومی خدمت ہمارے دل پہ نقش ہے۔
بیرون ملک روزگار کے حصول کے لئے جانے والے ہم وطنوں کی ہنر مندی اور پیشہ ورانہ استعداد کو بڑھانے کے لیۓ وفاقی حکومت نے خصوصی اقدامات کئے ہیں۔ وفاقی حکومت نے نیشنل سکلز ڈیویلپمنٹ پالیسی کے تحت ملکی صنعت وحرفت اور تجارت میں ہنر مندی کی مخصوص ضرویات اور جدید عصری تقاضوں سے ہم آہنگ کرنے کے لئے جامع حکمت عملی ترتیب دی ہے۔ بیرون ملک جانے والے پاکستانیوں کے لئے بالخصوص بین الاقوامی معیار کی تربیت، زبانوں پر عبور اور سرٹیفیکیشن کو یقینی بنایا جا رہا ہے تاکہ ہماری افرادی قوت دنیا میں باعزت طریقے سے اپنا مقام قائم کر سکے۔
آئیے آج کے دن تجدید عہد کریں کہ وفاقی حکومت اور صوبائی حکومتیں ، اجتماعی اور انفرادی سطح پر تمام افراد، تاجر حضرات، صنعتکار، مزدوروں کے حقوق کا تحفظ کریں گے۔
آیئے عہد کریں ،مزدوروں کے حقوق کا تحفظ کرینگے ،وزیراعظم
