اسلام آباد ( پاک ترک نیوز) وفاقی وزیر داخلہ محسن نقوی اور وزیر مملکت برائے داخلہ طلال چوہدری نے اسلام آباد سیف سٹی ہیڈکوارٹرز کا دورہ کیا، جہاں وزیر داخلہ کی زیر صدارت خصوصی اجلاس میں سیف سٹی توسیعی منصوبے پر پیش رفت کا تفصیلی جائزہ لیا گیا۔
اجلاس میں بریفنگ دی گئی کہ سیف سٹی توسیعی منصوبے پر مجموعی طور پر 85 فیصد کام مکمل ہو چکا ہے، جبکہ نئے کیمروں کی تنصیب کا بھی 85 فیصد مرحلہ مکمل کر لیا گیا ہے۔ اس کے علاوہ 415 کلومیٹر آپٹیکل فائبر بچھائی جا چکی ہے، جبکہ ڈیٹا سینٹر، سائبر آرکیٹیکچر اور سائبر سیکیورٹی سے متعلق 80 فیصد کام بھی مکمل ہو گیا ہے۔
وفاقی وزیر داخلہ محسن نقوی نے متعلقہ حکام کو ہدایت کی کہ سیف سٹی توسیعی منصوبہ ہر صورت 30 ستمبر تک مکمل کیا جائے۔ انہوں نے اسلام آباد سیف سٹی کے جدید فیوژن سینٹر کی تعمیر بھی تین ماہ میں مکمل کرنے کا ٹاسک دیا۔
یہ بھی پڑھیں: مون سون کے بعد خستہ حال عمارتوں کا سروے ہوگا، مریم نواز
محسن نقوی نے کہا کہ حکومت کا عزم ہے کہ اسلام آباد سیف سٹی کو جدید، اسمارٹ اور ترقی یافتہ ممالک کی طرز پر عالمی معیار کا ادارہ بنایا جائے۔ ان کا کہنا تھا کہ جدید ٹیکنالوجی سے لیس سیف سٹی نظام شہریوں کے تحفظ، مؤثر نگرانی، جرائم کی روک تھام اور ہنگامی صورتحال میں فوری رسپانس کو یقینی بنائے گا
