اسلام آباد ( پاک ترک نیوز) براڈ پیک پر برفانی تودہ گرنے کے حادثے میں جاں بحق ہونے والے پانچ غیر ملکی کوہ پیماؤں کی میتیں اسکردو سے خصوصی پرواز کے ذریعے اسلام آباد روانہ کر دی گئیں۔
حکام کے مطابق 31 جولائی کو براڈ پیک پر برفانی تودہ گرنے کے نتیجے میں 10 غیر ملکی کوہ پیما لاپتہ ہوگئے تھے۔ گزشتہ روز پاکستان آرمی ایوی ایشن اور زمینی سرچ ٹیموں کے مشترکہ سرچ آپریشن کے دوران پانچ کوہ پیماؤں کی میتیں برآمد کی گئیں۔
برآمد ہونے والی میتوں کو متعلقہ ممالک کے قومی پرچموں میں لپیٹ کر اسکردو سے ہوائی جہاز کے ذریعے اسلام آباد منتقل کیا گیا۔
حکام کا کہنا ہے کہ اسلام آباد پہنچنے کے بعد میتیں متعلقہ سفارت خانوں کے حوالے کی جائیں گی، جہاں سے انہیں ضروری قانونی کارروائی مکمل ہونے کے بعد ان کے آبائی ممالک روانہ کیا جائے گا۔
یہ بھی پڑھیں: اسلام آباد سیف سٹی توسیعی منصوبہ 85 فیصد مکمل،وزیرداخلہ کا سیف سٹی ہیڈ کوارٹرز کا دورہ
پاک فوج اس تمام عمل میں سول انتظامیہ اور متعلقہ سفارتی حکام کے ساتھ مکمل تعاون اور معاونت فراہم کر رہی ہے، جبکہ باقی لاپتہ کوہ پیماؤں کی تلاش کے لیے سرچ آپریشن بھی جاری ہے۔
