لاہور( پاک ترک نیوز ) پاکستان ریلوے نے مسافر کوچز، مال بردار بوگیوں اور انجنوں کی ناقص دیکھ بھال، اسپیئر پارٹس کی قلت اور ریلوے ورکشاپس کی بندش کے معاملے کی تحقیقات شروع کردی ہیں۔ بعض مال بردار بوگیاں ضروری پرزے موجود نہ ہونے کے باوجود غیر معیاری حالت میں چلائے جانے کا انکشاف بھی ہوا ہے۔وفاقی وزیر ریلوے محمد حنیف عباسی نے سیلاب سے متاثرہ لاہور فیصل آباد ریلوے ٹریک پر نئے تعمیر شدہ پل کے افتتاح کے موقع پر بتایا کہ ریلوے میں مرمت اور دیکھ بھال کے نظام کا جائزہ لیا جا رہا ہے، جبکہ ضروری پرزوں کی مقامی سطح پر تیاری دوبارہ شروع کرنے کے اقدامات بھی کیے جا رہے ہیں۔
انہوں نے بتایا کہ 27 جولائی کو سیلاب کے باعث تقریباً 1500 فٹ ریلوے ٹریک بہہ گیا تھا، جس کے بعد بحالی کا کام 23 ستمبر کو شروع کیا گیا اور صرف 45 روز میں مکمل کرلیا گیا، جو مقررہ 60 روزہ مدت سے 15 دن پہلے ہے۔ پل کی تعمیر مکمل ہونے کے بعد لاہور فیصل آباد ٹریک پر ٹرین آپریشن بحال کردیا گیا ہے۔وزیر ریلوے کے مطابق ٹریک کی بحالی سے شالیمار ایکسپریس، قراقرم ایکسپریس، بدر ایکسپریس، غوری ایکسپریس اور راوی ایکسپریس سمیت دیگر مسافر ٹرینوں کے ساتھ مال بردار ٹرین 503 کی آمدورفت بھی ممکن ہوگی۔حنیف عباسی نے بتایا کہ ریلوے کے 43 جی ای یو 43 انجن صرف دو یا تین ٹریکشن موٹرز کے ساتھ چل رہے ہیں، حالانکہ ہر انجن میں چھ موٹرز ہونا ضروری ہیں۔ اس وجہ سے ان انجنوں کی 3400 ٹن وزن کھینچنے کی صلاحیت متاثر ہورہی ہے۔ تمام 43 انجنوں کو 15 دسمبر تک مکمل فعال کرنے کا فیصلہ کیا گیا ہے۔
یہ بھی پڑھیں: شدید برفباری اور لینڈ سلائیڈنگ کا خطرہ، جھیل سیف الملوک جانے والی سڑک ٹریفک کے لیے بند
انہوں نے کہا کہ مسافر کوچز کا تکنیکی جائزہ مکمل کرلیا گیا ہے، جبکہ مال بردار ٹرینوں، دیگر ریلوے اثاثوں اور پٹریوں کا بھی اسی نوعیت کا معائنہ کیا جائے گا۔












