لندن ( پاک ترک نیوز) انگلینڈ کے فاسٹ بولر برائیڈن کارس ڈربی کے ایک نائٹ کلب میں مبینہ واقعے کے بعد انگلینڈ اینڈ ویلز کرکٹ بورڈ کی تحقیقات کی زد میں آگئے۔سوشل میڈیا پر گردش کرنے والی ویڈیوز میں برائیڈن کارس کو ہتھکڑیوں میں چار پولیس اہلکاروں کے ہمراہ نائٹ کلب سے باہر لے جاتے ہوئے دیکھا جاسکتا ہے۔
برائیڈن کارس انگلینڈ کے پاکستان کے خلاف دوسرے ٹیسٹ کے اسکواڈ میں شامل ہیں۔ واقعے کے وقت وہ ٹیم کی ڈیوٹی پر نہیں تھے اور پیر کو اسکواڈ کو جوائن کرنا تھا۔انگلینڈ اینڈ ویلز کرکٹ بورڈ نے واقعے کی تصدیق کرتے ہوئے کہا ہے کہ اسے ڈربی میں گزشتہ رات پیش آنے والے واقعے کا علم ہے اور اس معاملے کی تحقیقات جاری ہیں۔ بورڈ کا کہنا ہے کہ مزید معلومات دستیاب ہونے پر آگاہ کیا جائے گا۔
رپورٹس کے مطابق کارس کے ساتھ ان کے ٹیم ساتھی میتھیو پوٹس بھی موجود تھے، جبکہ سابق انگلش کپتان بین اسٹوکس کی موجودگی کی تصاویر بھی سامنے آئی ہیں۔یہ معاملہ ایسے وقت میں سامنے آیا ہے جب انگلینڈ کے نئے ٹیسٹ کپتان جو روٹ نے حال ہی میں کھلاڑیوں پر زور دیا تھا کہ وہ میدان کے اندر اور باہر اپنے ملک کی بہترین نمائندگی کریں اور اچھے رول ماڈل بنیں۔انگلینڈ کی ٹیم گزشتہ کچھ عرصے سے میدان سے باہر تنازعات کا شکار رہی ہے۔ گزشتہ موسم سرما میں ہیری بروک کا نائٹ کلب کے سیکیورٹی گارڈ کے ساتھ واقعہ اور ایشز سیریز کے دوران کھلاڑیوں کی شراب نوشی کے واقعات سامنے آئے تھے۔
یہ بھی پڑھیں: پنجاب میں کھلی فضا میں ڈرون اڑانے پر مکمل پابندی
بعد ازاں بین اسٹوکس کی جانب سے ٹیم کے کرفیو کی خلاف ورزی بھی تنازع کا باعث بنی، جس کے بعد انگلینڈ کو نیوزی لینڈ کے خلاف سیریز میں شکست، اسٹوکس کی ریٹائرمنٹ اور برینڈن میک کولم کی ٹیسٹ کوچ کے عہدے سے برطرفی کا سامنا کرنا پڑا۔برائیڈن کارس اس سے قبل بھی تنازع کا شکار رہ چکے ہیں۔ انہیں 2024 میں ماضی میں کی جانے والی 303 بیٹنگز کے معاملے پر تین ماہ کی کرکٹ معطلی کا سامنا کرنا پڑا تھا، تاہم ان بیٹنگز میں شامل میچز میں وہ خود شریک نہیں تھے۔
