دبئی ( پاک ترک نیوز) بھارت نے ایک بار پھر کھیل کو سیاست سے جوڑتے ہوئے نئی مثال قائم کردی، ویمنز ٹی ٹوئنٹی ایشیا کپ جیتنے کے باوجود بھارتی خواتین ٹیم نے ٹرافی وصول کرنے کی تقریب میں شرکت نہیں کی۔دبئی میں کھیلے گئے ویمنز ٹی ٹوئنٹی ایشیا کپ کے فائنل میں بھارت نے سری لنکا کو یکطرفہ مقابلے کے بعد 72 رنز سے شکست دے کر آٹھویں مرتبہ ایشیا کپ کا ٹائٹل اپنے نام کیا۔ بھارت نے پہلے بیٹنگ کرتے ہوئے مقررہ بیس اوورز میں 183 رنز بنائے، جواب میں سری لنکن ٹیم آخری گیند پر 111 رنز بنا کر آؤٹ ہوگئی۔ میچ کے بعد اصل تنازع اس وقت پیدا ہوا جب ایشین کرکٹ کونسل کے صدر محسن نقوی ٹرافی دینے کے لیے اسٹیج پر موجود تھے، لیکن بھارتی خواتین ٹیم ٹرافی وصول کرنے کے لیے ڈریسنگ روم سے باہر ہی نہ آئی۔ بھارتی ٹیم کی جانب سے ٹرافی اور میڈلز وصول نہ کرنے کی اطلاعات سامنے آئی ہیں۔
یہ بھی پڑھیں: ایجبسٹن ٹیسٹ میں سلو اوور ریٹ، پاکستان پر50فیصد جرمانہ، عالمی ٹیسٹ چیمپئن شپ پوائنٹس بھی کٹ گئے
رپورٹس کے مطابق بھارتی کرکٹ بورڈ نے تقریب سے پہلے ہی ایشین کرکٹ کونسل کو اپنے مؤقف سے آگاہ کردیا تھا۔ بھارتی کھلاڑی اسمرتی مندھانا نے بھی محسن نقوی کو اسٹیج پر دیکھنے کے بعد تقریب میں شرکت کے بجائے ڈریسنگ روم واپس جانے کا فیصلہ کیا۔ یہ واقعہ گزشتہ سال کے ایشیا کپ فائنل کی یاد تازہ کر گیا، جب بھارتی مردوں کی ٹیم نے بھی محسن نقوی سے ٹرافی وصول کرنے سے انکار کیا تھا۔ یوں ایک بار پھر کرکٹ کا میدان سیاسی کشیدگی کی زد میں آگیا ہے۔
