اسلام آباد ( پاک ترک نیوز) اسلام آباد میں یومِ آزادی کے موقع پر یادگارِ فتح کا افتتاح کردیا گیا۔ صدرِ مملکت آصف علی زرداری، وزیراعظم شہباز شریف اور فیلڈ مارشل سید عاصم منیر نے خصوصی تقریب میں شرکت کی، جبکہ سول و عسکری حکام بھی تقریب میں شریک ہوئے۔
یادگارِ فتح کی افتتاحی تقریب میں قومی جذبے، حب الوطنی اور دفاعِ وطن کے عزم کا شاندار مظاہرہ کیا گیا۔ مسلح افواج کے ساتھ سول آرمڈ فورسز کے دستوں نے بھی تقریب میں شرکت کی۔
پنجاب، سندھ، خیبرپختونخوا اور بلوچستان پولیس کے دستے بھی تقریب کا حصہ بنے، جبکہ آزاد کشمیر اور گلگت بلتستان پولیس کے دستوں نے بھی شرکت کی۔ مختلف صوبوں اور علاقوں سے تعلق رکھنے والے دستوں کی شرکت نے قومی اتحاد، یکجہتی اور وحدت کی خوبصورت عکاسی کی۔
تقریب سے خطاب کرتے ہوئے صدرِ مملکت آصف علی زرداری نے کہا کہ پاکستان امن کے عمل میں دنیا کے ساتھ ہے اور امن و استحکام کے لیے دنیا پاکستان کے کردار کی معترف ہے۔
صدر آصف علی زرداری نے کہا کہ معرکۂ حق میں پاک فوج نے فیلڈ مارشل سید عاصم منیر کی قیادت میں بھارت کو شکست دی۔ انہوں نے غزہ کی صورتحال پر بات کرتے ہوئے کہا کہ گریٹر اسرائیل کا خواب کبھی پورا نہیں ہوگا، غزہ میں نسل کشی کسی بھی صورت قبول نہیں۔
یادگارِ فتح کی افتتاحی تقریب سے خطاب کرتے ہوئے وزیراعظم شہباز شریف نے کہا کہ پانی کی ایک ایک بوند ہماری ریڈ لائن ہے، بھارت باز نہ آیا تو منہ توڑ جواب دیں گے۔
وزیراعظم نے کہا کہ پاکستان جنگ نہیں، امن چاہتا ہے، تاہم پاکستان کی امن کی خواہش کو کمزوری نہ سمجھا جائے۔ بھارت نے عبرتناک شکست کے بعد یکطرفہ طور پر سندھ طاس معاہدہ معطل کیا۔
شہباز شریف نے پاک بھارت جنگ بندی میں کردار ادا کرنے پر امریکی صدر ڈونلڈ ٹرمپ کا بھی شکریہ ادا کیا۔
یہ بھی پڑھیں: پاکستان اپنے دفاع کے لیے کسی قربانی سے دریغ نہیں کرے گا،وزیراعظم
وزیراعظم نے مزید کہا کہ فیلڈ مارشل سید عاصم منیر نے مشرقِ وسطیٰ میں امن کے لیے اہم کردار ادا کیا۔ مکہ دفاعی معاہدہ امن کی علامت ہے۔
یادگارِ فتح کی افتتاحی تقریب میں سول و عسکری قیادت، قانون نافذ کرنے والے اداروں اور مختلف صوبوں کے دستوں کی شرکت نے قومی اتحاد اور دفاعِ وطن کے مشترکہ عزم کو اجاگر کیا۔
