حکومت کا سیٹلائٹ انٹرنیٹ کیلئے متعدد کمپنیوں سے رابطے کا فیصلہ

اسلام آباد ( پاک ترک نیوز) حکومت نے سیٹلائٹ انٹرنیٹ کیلئے متعدد کمپنیوں سے رابطے کرنے کا فیصلہ کیا ہے ۔
ملک میں سیٹلائٹ پر مبنی انٹرنیٹ سروسز کا آغاز تاخیر کا شکار ہو گیا ہے کیونکہ حکام نے مزید کمپنیوں کومدعو کرنے اور غیر ملکی سیٹلائٹ آپریٹرز کے لیے سخت ضوابط وضع کرنے کی کوشش کی ہے۔
حکومت کی جانب سے یہ اقدا م حالیہ عالمی منظر نامہ پر ہونیوالی پاک بھارت اور ایران اسرائیل کشیدگی کے بعد سامنے آیا ہے ۔
مارچ میں اسٹار لنک کے لیے عارضی عدم اعتراض سرٹیفکیٹ (این او سی) کی میعاد ختم ہونے کے بعد، تمام غیر ملکی سیٹلائٹ آپریٹرز کو اب نئے مسودہ کردہ سیٹلائٹ کمیونیکیشن ریگولیشنز کے تحت نئی درخواستیں جمع کرنے کی ضرورت ہے۔
ان ضوابط کو پاکستان اسپیس ایکٹیویٹیز ریگولیٹری بورڈ (PSARB) کی طرف سے حتمی شکل دی جا رہی ہے، جو کہ حالیہ گول میز مباحثے کے دوران اکٹھے کیے گئے صنعتی تاثرات پر مبنی ہے۔