مدینہ منورہ ( پاک ترک نیوز) سعودی عرب میں مقیم پاکستانیوں، خصوصاً مدینہ منورہ اور گرد و نواح میں رہنے والے شہریوں کے لیے خوشخبری ہے۔ نادرا نے مدینہ رجسٹریشن سینٹر میں اپنی تمام سروسز دوبارہ بحال کر دی ہیں، جس کے بعد پاکستانی شہری شناختی کارڈ، رجسٹریشن اور دیگر دستاویزی خدمات دوبارہ حاصل کر سکیں گے۔
نادرا کے مطابق مدینہ دفتر کی سروسز 12 اپریل 2026 کو سعودی حکام اور جدہ میں پاکستانی قونصل خانے کی ہدایات پر عارضی طور پر معطل کی گئی تھیں۔ اس اقدام کا مقصد حج سیزن کے دوران انتظامی امور کو مؤثر بنانا اور حفاظتی انتظامات کو یقینی بنانا تھا۔
حج سیزن کے اختتام کے بعد مدینہ رجسٹریشن سینٹر دوبارہ فعال کر دیا گیا ہے، جس سے ہزاروں پاکستانی شہریوں کو شناختی دستاویزات سے متعلق سہولیات اپنے شہر میں ہی میسر آ سکیں گی۔
یہ بھی پڑھیں: وزیراعظم کی سعودی عرب پر حملوں کی مذمت
نادرا کا کہنا ہے کہ بیرونِ ملک مقیم پاکستانیوں کو بروقت اور آسان خدمات کی فراہمی ادارے کی اولین ترجیح ہے۔ اسی مقصد کے تحت عارضی بندش کے دوران جدہ رجسٹریشن سینٹر میں اضافی عملہ تعینات کیا گیا تھا تاکہ شہریوں کو خدمات کے حصول میں دشواری کا سامنا نہ کرنا پڑے۔
نادرا نے شہریوں کو ہدایت کی ہے کہ مزید معلومات یا رہنمائی کے لیے جدہ میں پاکستانی قونصل خانے سے رابطہ کریں، جبکہ متعدد خدمات پاک آئی ڈی موبائل ایپ کے ذریعے بھی آن لائن دستیاب ہیں، جن سے گھر بیٹھے فائدہ اٹھایا جا سکتا ہے۔
مدینہ رجسٹریشن سینٹر کی بحالی کے ساتھ ہی شناختی دستاویزات اور رجسٹریشن سے متعلق تمام معمول کی خدمات دوبارہ شروع کر دی گئی ہیں، جس سے مدینہ اور قریبی علاقوں میں مقیم پاکستانیوں کو نمایاں سہولت میسر آئے گی۔
