مظفر آباد ( پاک ترک نیوز) معروف کشمیری رہنما یاسین ملک کی اہلیہ مشعال ملک کا کہنا ہے کہ آسیہ اندرابی کو عمر قید دینا کشمیری قیادت کی آواز دبانے کی کوشش ہے۔
بھارتی عدالت کے حالیہ فیصلے پر مشعال ملک نے ویڈیو پیغام میں کہا کہ فیصلہ انصاف نہیں بلکہ ایک سوچی سمجھی سازش ہے۔
انہوں نے کہا کہ آسیہ اندرابی کو عمر قید دینا کشمیری قیادت کی آواز دبانے کی کوشش ہے۔یہ فیصلے انصاف کے تقاضوں کے برعکس ہیں۔
مشعال ملک نے مزید کہا کہ متنازع قوانین کے ذریعے آزادی کی جدوجہد کو کچلا جا رہا ہے۔یہ صرف چند افراد کی سزا نہیں، پوری قوم کے حقِ خودارادیت پر حملہ ہے۔عالمی برادری کی خاموشی بھی ظلم کا حصہ سمجھی جائے گی۔
ان کا مزید کہنا تھا کہ یہ فیصلہ نہیں، ایک قوم کی آواز کا گلا گھونٹا گیا ہے۔بھارتی عدالت نے انصاف نہیں، ظلم کا اعلان کیا ہے۔آسیہ اندرابی کی سزا نہیں، کشمیر کی امیدوں کو قید کیا گیا ہے۔سچ بولنا جرم بن گیا، یہ کیسا نظام ہے؟کشمیری قیادت کو خاموش کرانے کی سازش عروج پر ہے۔
مشعال ملک کا کہنا تھا کہ ہر جیل میں بند آواز آزادی کی چیخ بن چکی ہے، یہ سزائیں نہیں، انسانیت کے چہرے پر بدنما داغ ہیں۔
انہوں نے کہا کہ کشمیر کا درد بڑھ رہا ہے، دنیا خاموش کیوں؟، انصاف کا قتل ہو چکا، اب صرف خاموشی باقی ہے،آج نہ بولے تو کل تاریخ ہمیں مجرم لکھے گی۔












