جرمنی پاکستانی طلبہ کی تعداد بڑھانے کیلئے تیار

اسلام آباد: (پاک ترک نیوز)پاکستان اور جرمنی کے درمیان نوجوانوں کی تعلیم، ہنرمندی اور پیشہ ورانہ تربیت کے شعبوں میں تعاون کو مزید مضبوط بنانے پر اتفاق ہوا ہے، جس کے تحت جرمنی میں زیرِ تعلیم پاکستانی طلبہ کی تعداد میں نمایاں اضافہ متوقع ہے۔
وزیراعظم یوتھ پروگرام کے چیئرمین رانا مشہود احمد خان سے وزیراعظم آفس میں پاکستان میں تعینات جرمن سفیر اینکا لیپل نے ملاقات کی، جس میں نوجوانوں کے مستقبل سے متعلق مختلف منصوبوں پر تبادلۂ خیال کیا گیا۔
ملاقات میں تعلیمی مواقع، فنی تربیت اور مہارتوں کی ترقی کے شعبوں میں دوطرفہ شراکت داری کو وسعت دینے پر زور دیا گیا۔اس موقع پر جرمن سفیر نے بتایا کہ جرمنی پاکستانی طلبہ کے لیے تعلیمی دروازے مزید کھولنا چاہتا ہے۔
ان کا کہنا تھا کہ اس وقت جرمنی میں تقریباً 6 ہزار پاکستانی طلبہ تعلیم حاصل کر رہے ہیں، تاہم جرمن حکومت کا ہدف ہے کہ آنے والے برسوں میں یہ تعداد بڑھا کر 10 ہزار تک پہنچائی جائے۔
اینکا لیپل نے واضح کیا کہ جرمنی پاکستان کے ساتھ اکیڈمک ایکسچینج، فنی تعلیم اور ووکیشنل ٹریننگ کے شعبوں میں تعاون کو خاص طور پر فروغ دینا چاہتا ہے، تاکہ نوجوانوں کو عالمی معیار کی مہارتیں فراہم کی جا سکیں اور انہیں بین الاقوامی روزگار کے بہتر مواقع میسر آئیں۔
ملاقات کے دوران وزیراعظم یوتھ پروگرام کے تحت جاری گرین یوتھ موومنٹ پر بھی بات چیت کی گئی، جس کا مقصد نوجوانوں کو ماحولیاتی تحفظ اور موسمیاتی تبدیلی کے چیلنجز سے نمٹنے میں فعال کردار ادا کرنے کے لیے تیار کرنا ہے۔
جرمن سفیر نے نوجوانوں کی فلاح و بہبود اور روزگار سے متعلق اقدامات پر وزیراعظم یوتھ پروگرام کی کارکردگی کو سراہا۔ ملاقات کے اختتام پر دونوں جانب سے اس عزم کا اظہار کیا گیا کہ تعلیم، ہنرمندی، فنی تربیت اور یوتھ ایکسچینج پروگرامز میں تعاون کو مزید آگے بڑھایا جائے گا۔