اسلام آباد(پاک ترک نیوز ) فیسکو کی نجکاری کے لیے نشاط گروپ کے بعد سیفائر فائبرز لمیٹڈ بھی میدان میں آگئی۔
سیفائر فائبرز لمیٹڈ نے فیصل آباد الیکٹرک سپلائی کمپنی (فیسکو) کی نجکاری کے عمل میں حصہ لینے کا فیصلہ کرلیا ہے۔
کمپنی کی جانب سے پاکستان اسٹاک ایکسچینج کو جاری اعلامیے میں بتایا گیا ہے کہ سیفائر فائبرز نے نجکاری کمیشن کی جانب سے فیسکو کی نجکاری کے لیے جاری کردہ ریکوئسٹ فار اسٹیٹمنٹ آف کوالیفکیشن حاصل کرلی ہے۔
کمپنی کے بورڈ آف ڈائریکٹرز نے فیسکو کی نجکاری کے عمل میں حصہ لینے کی منظوری دے دی ہے، تاہم سیفائر فائبرز نے واضح کیا ہے کہ اس مرحلے پر کمپنی نے کوئی حتمی یا پابند ذمہ داری قبول نہیں کی۔
اعلامیے کے مطابق فیسکو کی نجکاری کے عمل میں حتمی شرکت نجکاری کمیشن سے پیشگی اہلیت کی منظوری اور دیگر ضروری کارپوریٹ و ریگولیٹری منظوریوں سے مشروط ہوگی۔
سیفائر فائبرز کا کہنا ہے کہ منظوری ملنے کے بعد کمپنی دیگر اداروں کے ساتھ مل کر کنسورشیم بھی تشکیل دے سکتی ہے۔
یہ بھی پڑھیں: فیفا کے نجکاری منصوبے پر یورپی فٹبال تنظیم کی ورلڈ کپ کے بائیکاٹ کی دھمکی
سیفائر فائبرز نے گزشتہ سال بلوچستان کے علاقے ڈیرہ مراد جمالی میں قائم یو سی ایچ پاور اور یو سی ایچ ٹو پاور میں 50،50 فیصد حصص بھی حاصل کیے تھے۔ یو سی ایچ پاور گیس سے بجلی پیدا کرنے والا 586 میگاواٹ جبکہ یو سی ایچ ٹو پاور 404 میگاواٹ کا پاور پلانٹ ہے۔
فیسکو ان بجلی کی تقسیم کار کمپنیوں میں شامل ہے جنہیں حکومت نے نجکاری کے لیے مقرر کیا ہے۔ فیسکو کے علاوہ اسلام آباد الیکٹرک سپلائی کمپنی اور گوجرانوالہ الیکٹرک پاور کمپنی کی نجکاری بھی حکومتی منصوبے کا حصہ ہے۔
حکومت کا کہنا ہے کہ ڈسکوز کی نجکاری کا مقصد بجلی کے شعبے میں کارکردگی بہتر بنانا، نقصانات کم کرنا اور نجی سرمایہ کاری کو فروغ دینا ہے۔
وفاقی کابینہ نے اگست 2024 میں فیسکو، آئیسکو اور گیپکو کی نجکاری کی منظوری دی تھی۔
