واشنگٹن (پاک ترک نیوز )امریکی میرین کور نے اپنی بکتر بند آبی جنگی گاڑیوں کو ڈرون حملوں سے محفوظ بنانے کے لیے جدید برقی جنگی نظام خریدنے کا فیصلہ کرلیا۔
رپورٹ کے مطابق میرین کور نے امریکی کمپنی اینڈوریل سے پلسر ایل نظام خریدنے کے لیے ایک کروڑ 57 لاکھ ڈالر سے زائد مالیت کا معاہدہ کیا ہے۔
پلسر ایل ایسا نظام ہے جو دشمن کے بغیر پائلٹ طیاروں کو تلاش، شناخت اور ان کی نگرانی کرنے کے ساتھ ان کے برقی رابطوں میں مداخلت کرکے انہیں ناکارہ بنانے کی صلاحیت رکھتا ہے۔
امریکی حکام کے مطابق یہ نظام چھوٹے اور درمیانے درجے کے ڈرونز کے خلاف استعمال کیا جائے گا، جن میں مسلح اور خودکش ڈرونز بھی شامل ہیں۔
رپورٹ میں بتایا گیا ہے کہ یوکرین کی جنگ کے دوران چھوٹے ڈرونز نے بکتر بند گاڑیوں اور ٹینکوں کے لیے بڑا خطرہ پیدا کیا، جس کے بعد امریکی فوج بھی اپنی بکتر بند گاڑیوں کے دفاع کو مزید مضبوط بنانے پر توجہ دے رہی ہے۔
پلسر ایل کی ایک اہم خصوصیت مشین لرننگ کی صلاحیت ہے، جس کے ذریعے نظام بدلتے ہوئے ڈرون خطرات اور ان کے برقی رابطوں کے طریقوں کے مطابق اپنی کارکردگی بہتر بنا سکتا ہے۔
امریکی میرین کور مستقبل میں بکتر بند گاڑیوں میں مزید حفاظتی نظام، بہتر نگرانی اور ڈرون شکن ٹیکنالوجی شامل کرنے کی بھی منصوبہ بندی کر رہی ہے۔
