اسلام آباد ( پاک ترک نیوز) ہاؤس بلڈنگ فنانس کمپنی لمیٹڈ کی نجکاری کا عمل دوبارہ شروع کردیا گیا۔ نجکاری کمیشن نے ہاؤس بلڈنگ فنانس کمپنی لمیٹڈ، ایچ بی ایف سی ایل کی نجکاری کے لیے کے پی ایم جی کی سربراہی میں قائم کنسورشیم کے ساتھ فنانشل ایڈوائزری سروسز ایگریمنٹ پر دستخط کردیئے۔
نجکاری کمیشن کے مطابق کنسورشیم مالیاتی مشاورت، لین دین کی ساخت اور نجکاری کے عمل کو عملی شکل دینے کے حوالے سے اپنی مہارت فراہم کرے گا۔
نجکاری کمیشن کا کہنا ہے کہ معاہدے کے بعد ہاؤس بلڈنگ فنانس کمپنی کی نجکاری کے عمل کو آگے بڑھانے کے لیے مالیاتی اور تکنیکی مشاورت فراہم کی جائے گی۔
یہ ایچ بی ایف سی ایل کی نجکاری کی دوسری کوشش ہے، اس سے قبل بھی حکومت کی جانب سے کمپنی کی نجکاری کا عمل شروع کیا گیا تھا، تاہم اسے کامیابی سے مکمل نہیں کیا جاسکا تھا۔
نجکاری کمیشن کے مطابق گزشتہ کوشش میں صرف ایک بولی دہندہ، پاکستان مارگیج ری فنانس کمپنی لمیٹڈ، پری کوالیفائی ہوا تھا۔تاہم نجکاری کا عمل اس وقت آگے نہ بڑھ سکا جب بولی دہندہ کی جانب سے پیش کی گئی قیمت مقررہ ریفرنس پرائس سے کم قرار پائی۔
یہ بھی پڑھیں: فیسکو کی نجکاری، نشاط گروپ کے بعد سیفائر فائبرز بھی دوڑ میں شامل
وفاقی کابینہ کی جانب سے منظور شدہ ریفرنس پرائس سے کم بولی آنے کے باعث نجکاری کمیشن نے اس پیشکش کو مسترد کردیا تھا۔اب حکومت نے ہاؤس بلڈنگ فنانس کمپنی کی نجکاری کے عمل کو دوبارہ آگے بڑھانے کے لیے کے پی ایم جی کی سربراہی میں مالیاتی ماہرین کے کنسورشیم کی خدمات حاصل کرلی ہیں۔
نجکاری کمیشن کے مطابق نئے مالیاتی مشیر نجکاری کے عمل میں لین دین کی ساخت، سرمایہ کاری کے امکانات اور بولی کے مراحل سمیت مختلف امور میں معاونت فراہم کریں گے۔
