واشنگٹن ( پاک ترک نیوز)امریکی نشریاتی ادارے سی این این کی جانب سے دعوی کیا گیا کہ واشنگٹن میں ڈرٹی بم حملے کے خدشے کے پیش نظر ہنگامی اقدامات کئے جا رہے ہیں ۔
سی این این نے 7 امریکی حکام کے حوالے سے رپورٹ کیا ہے کہ امریکی انٹیلی جنس کو ایسی معلومات ملی ہیں جن کے مطابق ایران ٹرمپ انتظامیہ کے اعلیٰ عہدیداروں کو نشانہ بنانے کے لیے واشنگٹن میں ’ڈرٹی بم‘ یا کیمیائی ہتھیار کے استعمال کی منصوبہ بندی کر رہا ہے۔
سی این ایسن کی جانب سے دعوی کیا گیا ہے کہ امریکی انٹیلی جنس اداروں کی ایک رپورٹ میں ایران کی جانب سے واشنگٹن پر ’ڈرٹی بم‘ گرائے جانے کا خدشہ ظاہر کیے جانے کے بعد امریکی حکام نے خطرات سے نمٹنے کے لیے ہنگامی اقدامات پر غور کرنا شروع کر دیا ہے۔
یہ رپورٹ ایسے وقت میں سامنے آئی ہے جب امریکی حکام ایران کی جانب سے موجودہ اور سابق امریکی عہدیداروں کو نشانہ بنانے کی مبینہ کوششوں پر پہلے ہی تشویش کا اظہار کرتے رہے ہیں۔ ایران کی جانب سے ممکنہ دھمکیوں کے پیش نظر امریکی وزیر خزانہ اسکاٹ بیسنٹ کو بھی گزشتہ ہفتے واشنگٹن میں اپنی رہائش گاہ سے فوجی اڈے پر منتقل کر دیا گیا تھا۔
ذرائع کے مطابق اسی وجہ سے امریکی حکام نے ممکنہ خطرے سے نمٹنے کے لیے ہنگامی منصوبہ بندی تیز کر دی ہے۔
ان منصوبوں میں مخصوص مقامات اور اہداف کی نشاندہی بھی کی گئی ہے تاہم امریکی حکام کے درمیان اس بات پر اختلاف ہے کہ ایران کے پاس ایسے حملے کے لیے مطلوبہ افراد اور صلاحیت موجود ہے یا نہیں۔
ذرائع کا کہنا ہے کہ یہ منصوبہ بندی فی الحال ممکنہ حملے کے لیے مختلف آپشنز تیار رکھنے کی کوشش ہے اسے ایران کی جانب سے فوری حملے کی تیاری کا اشارہ نہیں سمجھا جا رہا۔
یہ بھی پڑھیں: پاکستان معدنیات کے خزانے پر بیٹھا ہے، تانبہ سونے سے بھی زیادہ اہم ہے، عالمی کان کنی کمپنی کے سربراہ رابرٹ فریڈلینڈ
تاہم امریکی انٹیلی جنس نے جن منصوبوں کا پتا لگایا ہے وہ خاصے تفصیلی ہیں اور ان میں مقامات اور اہداف بھی شامل ہیں۔
وائٹ ہاؤس کی ترجمان لارین بِس نے ایک بیان میں کہا کہ امریکا ’ہر ممکنہ خطرے پر نظر رکھے ہوئے ہے تاہم اس وقت امریکی سرزمین کو کسی فوری حملے کا سامنا نہیں۔‘












