منیلا ( پاک ترک نیوز) فلپائن بیورو آف کسٹمز اور ڈرگ انفورسمنٹ ایجنسی کی مشترکہ کارروائی میں منیلا انٹرنیشنل کنٹینر پورٹ پر دو کنٹینرز سے تقریباً 43 کلوگرام میتھ ایمفیٹامین، جسے فلپائن میں شابو کہا جاتا ہے، برآمد کی گئی۔فلپائنی حکام کے مطابق ضبط کی گئی منشیات کی مالیت تقریباً 29 کروڑ 24 لاکھ فلپائنی پیسو ہے۔ حکام کے مطابق دونوں 20 فٹ کنٹینرز میں موجود سامان کو ٹالک اسٹونز ظاہر کیا گیا تھا، تاہم سخت رسک پروفائلنگ اور نگرانی کے بعد ان کی سو فیصد جسمانی تلاشی لی گئی۔
یہ بھی پڑھیں: بلوچستان میں سیکیورٹی فورسز کا انٹیلی جنس بیسڈ آپریشن، 2 دہشت گرد ہلاک
تلاشی کے دوران منشیات کو ایسے کپڑے کے پاؤچز میں چھپایا گیا تھا جنہیں پلاسٹر جیسے مواد سے ڈھانپ کر ٹالک اسٹونز جیسا بنایا گیا تھا تاکہ وہ تجارتی سامان میں باآسانی چھپ جائیں۔ لیبارٹری ٹیسٹ میں نمونوں میں میتھ ایمفیٹامین کی تصدیق ہوئی۔ فلپائنی کسٹمز کمشنر ایریل نیپوموسینو نے کہا کہ ہائی رسک کھیپ کی سخت پروفائلنگ، رسک مینجمنٹ اور مؤثر بارڈر کنٹرولز نے منشیات کی اسمگلنگ روکنے میں اہم کردار ادا کیا۔
