لندن ( پاک ترک نیوز) قطر کے دارالحکومت دوحہ سے برطانیہ کے شہر مانچسٹر جانے والی قطر ایئرویز کی پرواز کو اچانک رابطہ منقطع ہونے پر برطانوی فضائیہ کے دو یورو فائٹر ٹائفون لڑاکا طیاروں نے فضا میں گھیر کر مانچسٹر ایئرپورٹ تک پہنچایا۔
برطانوی وزارتِ دفاع کے مطابق واقعے کے بعد فوری طور پر کوئیک ری ایکشن الرٹ جاری کیا گیا کیونکہ طیارہ سول حکام کے لیے تشویش کا باعث بن گیا تھا۔ بعد ازاں صورتحال معمول پر آ گئی۔
قطر ایئرویز نے اپنے بیان میں کہا کہ برطانوی حکام کی جانب سے موصول ہونے والی سیکیورٹی اطلاع کے بعد طیارے کو رائل ایئر فورس کے لڑاکا طیاروں نے حفاظتی حصار میں لیا۔
یہ بھی پڑھیں: یوکرین کے ناظم الامور کی ایرانی وزارت خارجہ میں طلبی ، ایرانی تجارتی جہاز پر حملے پر احتجاج ریکارڈ
رپورٹس کے مطابق طیارے کا فضائی ٹریفک کنٹرول سے رابطہ ممکنہ طور پر کسی تکنیکی خرابی کی وجہ سے عارضی طور پر منقطع ہو گیا تھا۔ برطانوی فضائی حدود میں کسی مسافر طیارے کا جواب نہ دینا ممکنہ سکیورٹی خطرہ تصور کیا جاتا ہے، جس پر فوری طور پر لڑاکا طیارے روانہ کیے جاتے ہیں تاکہ رابطہ بحال کیا جا سکے۔
