لاہور( پاک ترک نیوز) مہنگے پٹرول سے پریشان عوام کے لیے خوشخبری ، توانائی بحران کے دوران عوام کو ریلیف دینے کیلئے وفاقی حکومت نے بڑا قدم اٹھا لیا ،، کم آمدن والوں کیلئے حکومت کا بڑا ریلیف پلان بن گیا،پٹرول پر سبسڈی کے لیے ایپ تیار کر لی گئی ۔
وفاقی حکومت کی ہدایت پر وزارت انفارمیشن ٹیکنالوجی نے پیٹرول سبسڈی دینے کیلئے ایپ تیار کی ، جو فی الحال ٹیسٹنگ کے مراحل میں ہے۔ ذرائع کے مطابق ٹو تھری ویلرز گاڑیوں کو سبسڈی دی جائے گی تاہم دیگر صارفین تک عالمی مارکیٹ میں قیمتوں میں اضافہ منتقل کیا جائے گا۔ ٹو تھری ویلرز کیلئے پیٹرول کا کوٹہ مختص کیا جائے گا، موٹر سائیکلز کیلئے ماہانہ 20 لیٹر تک پیٹرول کا کوٹہ مقرر کرنے کی تجویز ہے۔800 سی سی گاڑیوں تک سبسڈی کا فیصلہ نہیں ہو سکا۔
ذرائع کے مطابق ملک کے 12 ہزار پیٹرول پمپس پر سبسڈی کیلئے نوزلز مختص کی جائیں گی، ہر پیٹرول پمپ پر 2 موبائل فونز فراہم کیے جائیں گے اسی طرح ہر پیٹرول پمپ پر موبائل فونز ایپ کے ذریعے پیٹرول دیا جائے گا۔
حکومت کا کہنا ہے کہ اس اقدام سے نہ صرف مہنگائی کا بوجھ کم ہوگا بلکہ توانائی بحران کے اثرات سے بھی عوام کو کسی حد تک بچایا جا سکے گا۔
ماہرین کے مطابق اس اقدام سے مستحق افراد کو براہ راست ریلیف ملے گا اور سبسڈی کا نظام شفاف بنایا جا سکے گا۔
ایپ کے ذریعے رجسٹرڈ صارفین کو شناختی معلومات کی بنیاد پر سبسڈی دی جائے گی، تاکہ صرف حقدار افراد ہی اس سہولت سے فائدہ اٹھا سکیں۔
سوال یہ ہے کیا یہ سبسڈی واقعی عام آدمی تک پہنچ پائے گی؟ یا پھر ایک اور وعدہ ہی ثابت ہوگی؟وقت بتائے گا… مگر فی الحال عوام کو اس ریلیف کا شدت سے انتظار ہے۔
