جدہ(پاک ترک نیوز ) سعودی وزارت حج و عمرہ نے گزشتہ عمرہ سیزن کے دوران ناقص کارکردگی اور ضوابط کی خلاف ورزیوں پر 21 عمرہ سروس کمپنیوں کو معطل کر دیا ۔
وزارت کے مطابق کمپنیوں کی کارکردگی کے جائزے میں سروسز کے معیار میں کمی اور قواعد و ضوابط کی خلاف ورزیاں سامنے آئیں، جس کے بعد یہ کارروائی عمل میں لائی گئی۔
بیان میں کہا گیا ہے کہ معطل کی جانے والی 21 کمپنیوں میں سے 15 مطلوبہ کارکردگی کے معیار پر پورا اترنے میں ناکام رہیں، جبکہ 6 کمپنیوں کے خلاف ریگولیٹری خلاف ورزیوں پر تادیبی کارروائی کی گئی۔
وزارت حج و عمرہ کا کہنا ہے کہ کمپنیوں کی جانچ کا نظام آپریشنل اور نگرانی کے اشاریوں پر مبنی ہے، جس کے ذریعے سروس کے معیار اور ضوابط پر عملدرآمد کا جائزہ لیا جاتا ہے۔
وزارت نے واضح کیا کہ عمرہ زائرین اور مسجد نبویؐ آنے والے مہمانوں کو بہترین سہولیات فراہم کرنا اولین ترجیح ہے اور اس سلسلے میں کسی قسم کی کوتاہی یا زائرین کے حقوق کی خلاف ورزی برداشت نہیں کی جائے گی۔
سعودی وزارت کے مطابق عمرہ سروس فراہم کرنے والی کمپنیوں کی مسلسل نگرانی اور کارکردگی کا جائزہ شعبے کی بہتری، خدمات کے معیار میں اضافے اور سعودی وژن 2030 کے اہداف کے حصول کے لیے اہم کردار ادا کرے گا۔
