پرتھ (پاک ترک نیوز) بگ بیش لیگ کے سیزن 15میں پاکستان کے مایہ ناز بلے باز بابراعظم کی ٹیم سڈنی سکسرز کوالیفائر میں کل پرتھ سکارچرز کے مد مقابل آئے گی ۔
بگ بیش لیگ اپنے اختتام کی جانب گامزن ہے ۔ مایہ ناز پاکستانی بلے باز بابراعظم کی ٹیم سڈنی سکسرز کا جوڑ کل پرتھ سکارچرز سے کوالیفائرز میں پڑے گا ۔
سڈنی سکسرز نے بگ بیش لیگ کے سیزن 15میں 10میچز کھیل کر 6میں کامیابی سمیٹی تھی اور پوائنٹس ٹیبل پر اس کی پوزیشن دوسری ہے ۔ دوسری جانب پرتھ سکارچرز نے 10میں سے 7میچز میں کامیابی حاصل کی اور ٹاپ پوزیشن پر موجود ہے ۔
دوسری جانب ہوبارٹ ہورکینز اور میلبورن سٹار کی ٹیمیں ناک آئوٹ مرحلے میں 21جنوری کو ٹکرائیں گی ۔ ہوبارٹ ہورکینز اور میلبورن سٹار بالترتیب پوائنٹس ٹیبل پر تیسری اور چوتھی پوزیشن پر موجود ہیں ۔
کوالیفائر میں کامیابی حاصل کرنے والی ٹیم فائنل کا ٹکٹ کٹوائے گی جبکہ شکست کھانے والی ٹیم کا مقابلہ 23جنوری کو ناک آئوٹ کی کامیاب ٹیم سے ہو گا ۔
میگا ایونٹ کا فائنل 25جنوری کو ہو گا ۔
واضح رہے کہ بابر اعظم بگ بیش لیگ میں اپنا پہلا سیزن کھیل رہے ہیں تاہم وہ خاص کارکردگی کا مظاہرہ کرنے میں کامیاب نہیں ہو سکے ہیں ۔حارث رئوف بگ بیش لیگ میں میلبورن سٹار کی نمائندگی کر رہے ہیں ۔
