لندن (پاک ترک نیوز)پاکستان ٹیسٹ ٹیم کے کپتان بابر اعظم نے کہا ہے کہ ٹیم کے مفاد میں سینئر کھلاڑی کو بھی باہر بٹھایا جا سکتا ہے، جو کھلاڑی ٹیم کے لیے بہتر ہوگا وہی پلیئنگ الیون کا حصہ بنے گا۔
لندن میں پریس کانفرنس کرتے ہوئے بابر اعظم نے کہا کہ انگلینڈ کے خلاف دوسرے ٹیسٹ کے لیے ٹیم کمبی نیشن ابھی حتمی نہیں کیا گیا، انگلینڈ میں کامیابی کے لیے ٹیم کو بھرپور کارکردگی دکھانا ہوگی۔
بابر اعظم نے کہا کہ سینئر کھلاڑی کو باہر بٹھانے میں کوئی برائی نہیں، محمد رضوان پر کوئی دباؤ نہیں اور ٹیم کے تمام کھلاڑیوں کو اپنی ذمہ داری ادا کرنا ہوگی۔
کپتان نے کہا کہ کوشش ہوگی کہ لارڈز میں مسلسل تیسری فتح حاصل کرکے فتوحات کی ہیٹ ٹرک مکمل کی جائے۔
انہوں نے ٹیم کی بیٹنگ پر بات کرتے ہوئے کہا کہ آخری نمبروں پر آنے والے بیٹرز مطلوبہ رنز نہیں بنا رہے، جبکہ دوسرے اسپنر کے طور پر سلمان آغا کو کھلایا جا رہا ہے۔
اپنی فٹنس سے متعلق بابر اعظم نے واضح کیا کہ وہ لارڈز ٹیسٹ کھیلنے کے لیے مکمل طور پر فٹ ہیں۔
قومی کپتان کا کہنا تھا کہ ٹیم کو احساس ہے کہ وہ اپنی توقعات کے مطابق نہیں کھیل سکی۔ بیٹرز پارٹنرشپ قائم کرنے کے بعد مسلسل وکٹیں گنوا دیتے ہیں، جس سے ٹیم مشکلات کا شکار ہوتی ہے۔
بابر اعظم نے کہا کہ گزشتہ غلطیوں سے سیکھنا اور ذمہ داری لینا ہوگی۔ اگر بولرز مخالف ٹیم کے 20 کھلاڑی آؤٹ کر سکتے ہیں تو بیٹرز کی ذمہ داری ہے کہ وہ اس کا فائدہ اٹھاتے ہوئے رنز بنائیں۔ یہ ذمہ داری صرف محمد رضوان کی نہیں بلکہ پوری ٹیم کی ہے
