واشنگٹن ( پاک ترک نیوز) کائنات کے سینے میں چھپے حیرت انگیز راز ایک بار پھر دنیا کے سامنے آگئے۔۔۔ناسا نے خلا کی 16 ایسی تصاویر جاری کردیں جنہوں نے ماہرین فلکیات کو بھی حیران کردیا۔۔۔تصاویر میں دیوہیکل کہکشائیں، طاقتور بلیک ہولز، خلا میں دوڑتی توانائی کی جیٹس اور ستاروں کی دھماکہ خیز پیدائش کے مناظر شامل ہیں۔ناسا کی چندرا ایکس رے آبزرویٹری نے کئی دہائیوں میں جمع کیے گئے ڈیٹا کو جیمز ویب اور ہبل سمیت جدید دوربینوں کے مشاہدات سے جوڑ کر کائنات کی یہ حیرت انگیز گیلری تیار کی ہے۔کائنات کے سب سے پراسرار اجسام میں شامل بلیک ہولز بھی اس گیلری کا حصہ ہیں۔۔۔سینٹورس اے میں ایک طاقتور بلیک ہول سے نکلنے والی ذرات کی جیٹ دسیوں ہزار نوری سال تک خلا میں پھیلی ہوئی ہے۔
کہیں بلیک ہول اردگرد کی گیس کو لاکھوں ڈگری تک گرم کررہے ہیں۔۔۔ تو کہیں انہی طاقتور مظاہر سے کہکشاؤں کی شکل و ساخت تبدیل ہورہی ہے۔مشہور سومبریرو کہکشاں میں بھی ایک بڑا سپر میسیو بلیک ہول موجود ہے، جبکہ چندرا کے ایکس رے مشاہدات نے اس کے گرد موجود انتہائی گرم گیس اور ستاروں کے باقیات کا بھی سراغ لگایا ہے۔اور سب سے حیران کن مناظر میں شامل ہیں کہکشاؤں کے خوفناک تصادم۔۔۔
یہ بھی پڑھیں: چین کا تیان گونگ خلا کا واحد مستقل انسانی اڈہ؟
اربوں سال پر محیط اس کائناتی رقص میں کہکشائیں ایک دوسرے سے ٹکراتی ہیں، نئی ساخت اختیار کرتی ہیں اور ستاروں کی پیدائش کی نئی لہریں جنم لیتی ہیں۔ماہرین کے مطابق ان مشاہدات سے نہ صرف دوسری کہکشاؤں کا ماضی اور مستقبل سمجھنے میں مدد مل رہی ہے بلکہ ہماری اپنی ملکی وے کے مستقبل کے بارے میں بھی اہم اشارے مل رہے ہیں۔۔۔کیونکہ مستقبل میں ہماری کہکشاں کا قریبی اینڈرومیڈا کہکشاں کے ساتھ تصادم متوقع ہے۔ کائنات بظاہر خاموش ہے۔۔۔ لیکن ناسا کی یہ تصاویر بتا رہی ہیں کہ خلا کے اندر ہر لمحہ کچھ نہ کچھ انتہائی طاقتور اور حیران کن ہو رہا ہے۔۔
