اسلام آباد(پاک ترک نیوز) وطن عزیز کے لیے جانوں کا نذرانہ پیش کرنے والے شہداء اور غیر معمولی شجاعت و بہادری کا مظاہرہ کرنے والے غازیوں کو سول اعزازات دینے کی منظوری دے دی گئی۔
وفاقی وزیر داخلہ محسن نقوی کی زیر صدارت گیلنٹری ایوارڈز سے متعلق خصوصی کمیٹی کا اجلاس ہوا، جس میں مختلف کیٹیگریز میں 78 افراد کے لیے سول اعزازات کی منظوری دی گئی۔
اجلاس میں ملک و قوم کے لیے جان قربان کرنے والے شہداء اور غیر معمولی بہادری کا مظاہرہ کرنے والے افراد کی خدمات کو سراہا گیا۔
وفاقی وزیر داخلہ محسن نقوی نے کہا کہ ملک و قوم کی خاطر جانوں کا نذرانہ پیش کرنے والوں اور غیر معمولی شجاعت کا مظاہرہ کرنے والوں کی حوصلہ افزائی قومی ذمہ داری ہے۔
انہوں نے کہا کہ وطن عزیز اپنے شہداء اور غازیوں کی لازوال قربانیوں کا احسان مند ہے، جبکہ ان کی عظیم قربانیاں پوری قوم کا قیمتی سرمایہ ہیں۔
یہ بھی پڑھیں: اسلام آباد سیف سٹی توسیعی منصوبہ 85 فیصد مکمل،وزیرداخلہ کا سیف سٹی ہیڈ کوارٹرز کا دورہ
محسن نقوی نے کہا کہ شہداء اور غازیوں نے وطن کے دفاع، امن اور سلامتی کے لیے جو قربانیاں دی ہیں، قوم انہیں ہمیشہ یاد رکھے گی اور ان کی خدمات کو خراج تحسین پیش کرتی رہے گی۔
اجلاس میں وزیر مملکت داخلہ طلال چوہدری، وفاقی سیکرٹری داخلہ، ڈی جی ایف آئی اے، ایڈیشنل سیکرٹری کابینہ اور دیگر متعلقہ حکام نے شرکت کی، جبکہ چاروں صوبوں کے نمائندوں نے اجلاس میں بذریعہ ویڈیو لنک شرکت کی۔
