مکہ مکرمہ(پاک ترک نیوز ) سعودی وزارت حج و عمرہ نے 1448 ہجری کے حج سیزن کے لیے غیر ملکی عازمین حج کی سہولت کے لیے جامع پیکیج متعارف کرا دیا۔وزارت حج کے مطابق نئے پیکیج میں عازمین کی سعودی عرب آمد سے لے کر واپسی تک ضروری خدمات کو ایک ہی برقی معاہدے کے تحت شامل کیا گیا ہے۔پیکیج میں مقدس مقامات کی خدمات، مکہ مکرمہ اور مدینہ منورہ میں رہائش و میزبانی، آمد و رفت اور کھانے کی سہولت شامل ہے، جبکہ اضافی سہولیات بھی اختیاری طور پر حاصل کی جاسکیں گی۔وزارت کے مطابق اس نظام کے تحت غیر ملکی حج امور کے دفاتر اور متعلقہ ادارے مختلف گروہوں کے عازمین کی ضروریات کے مطابق اپنے حج پروگرام ترتیب دے سکیں گے۔
یہ بھی پڑھیں: سعودی عرب کو جولائی میں 3 ارب 83 کروڑ ڈالر کا تجارتی سرپلس حاصل
سعودی وزارت حج و عمرہ کا کہنا ہے کہ اس پیکیج کا اجرا حج کی ابتدائی تیاریوں کا حصہ ہے، جس کا مقصد عازمین کو منظم اور بہتر سہولیات فراہم کرنا ہے۔وزارت کے مطابق یہ اقدام سعودی وژن 2030ء اور عازمین کے تجربے کو بہتر بنانے کے پروگرام کے اہداف سے بھی ہم آہنگ ہے۔
