لاہور( پاک ترک نیوز) پنجاب کی دیہی خواتین کو ہنرمند اور خودمختار بنانے کے لیے وزیراعلیٰ مریم نواز شریف کا ’’شی تھریڈ‘‘ پروگرام جاری ہے۔ پروگرام کے تحت اب تک ایک ہزار 150 دیہی خواتین ٹیکسٹائل کی تربیت حاصل کرکے برسرِ روزگار ہو چکی ہیں، جبکہ وزیراعلیٰ نے جون تک 2 ہزار 500 خواتین کو تربیت دینے کا ہدف مقرر کر دیا ہے۔اس پروگرام کے تحت خواتین کو صرف ہنر ہی نہیں سکھایا جائے گا بلکہ تین ماہ کی تربیت کے دوران ماہانہ 15 ہزار روپے وظیفہ بھی دیا جائے گا۔ تربیت مکمل کرنے والی خواتین کو ٹیکسٹائل انڈسٹری میں روزگار فراہم کرنے کا بھی منصوبہ ہے۔
محکمہ ویمن ڈویلپمنٹ کے زیرِ اہتمام پروگرام میں صنعتی سلائی مشین آپریٹر اور اپیرل سپروائزر کی تربیت دی جائے گی۔ اس مقصد کے لیے لاہور کے قریب ملتان روڈ پر واقع شاہکام انڈسٹریز میں تربیتی انتظامات کیے گئے ہیں، جہاں کلاس روم تعلیم کے ساتھ عملی تربیت بھی فراہم کی جائے گی۔پروگرام میں داخلے کے لیے خواتین کی عمر 18 سے 45 سال، میٹرک کی تعلیمی قابلیت اور پنجاب کا ڈومیسائل ہونا ضروری ہے۔ خواہش مند خواتین قومی شناختی کارڈ اور ڈومیسائل کے ساتھ شاہکام انڈسٹریز میں درخواست جمع کرا سکتی ہیں۔ابتدائی جانچ پڑتال اور اہلیت کی تصدیق کے بعد داخلے سے قبل حلف نامہ بھی جمع کرانا ہوگا۔ مزید معلومات اسسٹنٹ کمشنرز، یونین کونسل سیکرٹریز اور متعلقہ ضلعی دفاتر سے حاصل کی جا سکتی ہیں۔
یہ بھی پڑھیں: امریکا کی روسی گیس یورپ کو دوبارہ فراہم کرنے کی حمایت، یوکرین کے راستے پائپ لائنیں بحال کرنے کی تجویز
وزیراعلیٰ مریم نواز شریف کا کہنا ہے کہ دیہی خواتین کو مارکیٹ کی ضروریات کے مطابق ہنر سکھا کر باوقار روزگار کے قابل بنانا حکومت کا مقصد ہے، تاکہ خواتین معاشی طور پر خودمختار ہو سکیں اور ملکی معیشت میں اپنا کردار ادا کریں۔
