لاہور ( پاک ترک نیوز) وزیراعلیٰ پنجاب مریم نواز شریف نے صوبے کو سرسبز و شاداب بنانے اور ہر شہر، قصبے اور گاؤں کو پھولوں سے سجانے کے لیے ہر ضلع میں پارکس اینڈ ہارٹی کلچر اتھارٹی قائم کرنے کی منظوری دے دی۔ پہلے مرحلے میں 11 مزید اضلاع میں نئی اتھارٹیز قائم کر دی گئی ہیں، جبکہ مزید 20 اضلاع میں ان کے قیام کے لیے جنوری 2027 کی آخری تاریخ مقرر کی گئی ہے۔وزیراعلیٰ مریم نواز شریف کی زیر صدارت اجلاس میں صوبے بھر میں شجرکاری، پارکوں کی بحالی اور موسمی پھولدار پودے لگانے کے منصوبوں پر تفصیلی بریفنگ دی گئی۔ اجلاس میں پارکس اینڈ ہارٹی کلچر اتھارٹیز کے لیے 2820 تکنیکی آسامیوں پر بھرتیوں کی بھی منظوری دی گئی۔ ہر ضلع میں منیجنگ ڈائریکٹر، ڈائریکٹرز اور تکنیکی عملہ تعینات کیا جائے گا۔
وزیراعلیٰ نے ہدایت کی کہ موسم کے مطابق پھولدار پودے لگانے کے لیے ماہانہ منصوبہ بندی کی جائے اور ہر تحصیل، شہر اور گاؤں کی سطح پر مرحلہ وار شجرکاری کی جائے۔ دوسرے مرحلے میں پنجاب کی ہر تحصیل میں بھی پارکس اینڈ ہارٹی کلچر اتھارٹیز قائم کی جائیں گی۔اجلاس میں فیصلہ کیا گیا کہ ہر ضلع میں اتھارٹی کے زیر انتظام اپنی نرسری قائم کی جائے گی، جہاں کم قیمت پر پودے دستیاب ہوں گے۔ ان نرسریوں میں شجرکاری اور موسمی پھولوں کے لیے پودے تیار کیے جائیں گے۔ وزیراعلیٰ نے ہر خالی جگہ پر درخت اور پھولدار پودے لگانے کی ہدایت بھی کی۔بریفنگ میں بتایا گیا کہ لاہور میں سی کیٹیگری کے تمام پارک بحال کر دیے گئے ہیں۔ ہر اتھارٹی کو شہری علاقوں کی خوبصورتی بڑھانے، پارکوں کی بہتری اور سبز پٹیوں کی بحالی کے اہداف دیے گئے ہیں۔ موسم کے مطابق معیاری شجرکاری اور رنگا رنگ پھول لگانے کا سلسلہ بھی جاری ہے۔حکام کے مطابق خیابانِ جناح میں بوگن ویلیا، عطا بخش روڈ پر بانس اور دیگر سڑکوں پر املتاس کے درخت لگائے گئے ہیں، جبکہ صوبے بھر میں میری گولڈ کے تینوں رنگوں کی اقسام کے پھول اگائے جا رہے ہیں۔اجلاس میں ہر شہر میں یکساں ڈیزائن کے گملے اور پودوں کے برتن رکھنے، پارکس اینڈ ہارٹی کلچر اتھارٹیز کے عملے اور گاڑیوں کی یکساں شناخت متعارف کرانے اور فوڈ کورٹ کے ڈیزائن کی منظوری بھی دی گئی۔ وزیراعلیٰ نے ہر ضلعی اتھارٹی سے وسائل کا منصوبہ طلب کر لیا اور افسران کی کارکردگی جانچنے کے لیے کلیدی کارکردگی پیمانے تشکیل دینے کی ہدایت کی۔
یہ بھی پڑھیں: برطانیہ میں امریکی فضائی اڈے میں داخلے پر 2 افراد گرفتار
مریم نواز شریف نے کہا کہ وہ پنجاب کے ہر شہر، قصبے اور گاؤں کو درختوں اور پودوں سے سجا ہوا اور پھولوں سے مہکتا دیکھنا چاہتی ہیں۔ ان کے مطابق شجرکاری ماحول کے ساتھ انسانی صحت پر بھی مثبت اثرات مرتب کرتی ہے، جبکہ درخت لگانا ثواب کے ساتھ موسمیاتی تبدیلیوں کے اثرات سے بچاؤ کا ذریعہ بھی ہے۔
