لاہور( پاک ترک نیوز) لاہور میں سالگرہ کی تقریب کے دوران گھر کی چھت گرنے سے ایک ہی خاندان کے نو افراد جاں بحق ہو گئے، جبکہ فیصل آباد میں بھی مکان کی چھت گرنے سے دو معصوم بچے زندگی کی بازی ہار گئے۔ وزیراعلیٰ پنجاب مریم نواز نے افسوس کا اظہار کرتے ہوئے زخمیوں کو بہترین طبی سہولیات فراہم کرنے کی ہدایت کی ہے۔
لاہور میں بارش ایک اور خاندان کے لیے قیامت بن گئی۔ باغبانپورہ کے قریب محمد دین کالونی میں ایک خستہ حال مکان کی چھت اچانک گر گئی، جس کے نتیجے میں ایک ہی خاندان کے نو افراد جاں بحق جبکہ متعدد زخمی ہو گئے۔
ذرائع کے مطابق افسوسناک واقعہ اس وقت پیش آیا جب گھر میں ایک بچے کی سالگرہ کی تقریب جاری تھی اور اہل خانہ ایک ہی کمرے میں موجود تھے کہ اچانک چھت زمین بوس ہو گئی۔
جاں بحق ہونے والوں میں 60 سالہ شاہد، 52 سالہ ثمینہ، 25 سالہ مجاہد، 7 سالہ حماد اور دیگر افراد شامل ہیں۔ زخمیوں اور جاں بحق افراد کو فوری طور پر اسپتال منتقل کر دیا گیا۔
ریسکیو حکام کے مطابق ملبے تلے مزید دو سے تین افراد کے دبے ہونے کا خدشہ ہے، جنہیں نکالنے کے لیے امدادی کارروائیاں مسلسل جاری ہیں۔
دوسری جانب فیصل آباد کے جھنگ روڈ پر بھی بارش کے باعث ایک گھر کی چھت گر گئی، جس کے نتیجے میں چھ ماہ کا محمد رضوان اور پانچ سالہ محمد سبحان جاں بحق جبکہ دو افراد زخمی ہو گئے۔ زخمیوں کو طبی امداد کے لیے اسپتال منتقل کر دیا گیا ہے۔
یہ بھی پڑھیں: کراچی ،گھر میں جنریٹر کا دھواں بھرنےسے 2افراد جاں بحق ،4کی حالت غیر
ادھر وزیراعلیٰ پنجاب مریم نواز نے باغبانپورہ میں چھت گرنے کے افسوسناک واقعے پر گہرے دکھ اور افسوس کا اظہار کیا ہے۔ انہوں نے جاں بحق افراد کے لواحقین سے تعزیت کرتے ہوئے زخمیوں کو بہترین طبی سہولیات فراہم کرنے کی ہدایت کی ہے۔
وزیراعلیٰ کی ہدایت پر ڈپٹی کمشنر لاہور اور دیگر انتظامی افسران موقع پر موجود ہیں اور ریسکیو و امدادی سرگرمیوں کی نگرانی کر رہے ہیں۔
