لاہور(پاک ترک نیوز )ہال روڈ پر نمبر پلیٹ میں ٹیمپرنگ کی جانچ کے دوران حیران کن انکشاف ہوا ہے، شہری کی گاڑیوں کو 2 ہزار 813 ای چالان جاری، 28 لاکھ 66 ہزار 900 روپے جرمانہ واجب الادالاہور کے علاقے ہال روڈ پر نمبر پلیٹ میں ردوبدل کے معاملے کی جانچ پڑتال کے دوران ایک شہری کے نام پر 2 ہزار 354 موٹرسائیکلیں، رکشے اور گاڑیاں رجسٹرڈ ہونے کا انکشاف ہوا ہے، جس نے ٹریفک پولیس اہلکاروں کو بھی حیران کر دیا۔
تفصیلات کے مطابق جنرل ہولڈ اپ کے دوران ایک موٹرسائیکل سوار کو رکنے کا اشارہ کیا گیا۔ موٹرسائیکل کی ملکیت اور نمبر پلیٹ کی جانچ پڑتال کی گئی تو معلوم ہوا کہ محمد عثمان نامی شہری کے نام پر مجموعی طور پر 2 ہزار 354 وہیکلز رجسٹرڈ ہیں۔ریکارڈ کے مطابق ان گاڑیوں کے خلاف ٹریفک قوانین کی خلاف ورزیوں پر 2 ہزار 813 ای چالان جاری کیے جا چکے ہیں، جبکہ مجموعی طور پر 28 لاکھ 66 ہزار 900 روپے کے جرمانے واجب الادا ہیں۔پولیس نے موٹرسائیکل کو تھانہ قلعہ گجر سنگھ میں بند کر دیا ہے، جبکہ اصل مالک کی تلاش اور معاملے کی مزید جانچ پڑتال کے لیے سیف سٹی حکام کو آگاہ کر دیا گیا ہے۔
یہ بھی پڑھیں: استنبول میں 8 ممالک کے وزرائے خارجہ کا اہم اجلاس، علاقائی تنازعات کے حل کے لیے سفارت کاری پر زور
چیف ٹریفک آفیسر لاہور سید عبدالرحیم شیرازی کی ہدایت پر نمبر پلیٹس کے ساتھ چھیڑ چھاڑ کرنے والوں کے خلاف کریک ڈاؤن مزید تیز کر دیا گیا ہے۔ سی ٹی او کے مطابق قانون شکن عناصر کے خلاف زیرو ٹالرنس پالیسی جاری ہے۔سید عبدالرحیم شیرازی نے خبردار کیا ہے کہ پولیس فلیشر لائٹس، غیر قانونی سبز نمبر پلیٹس اور نمبر پلیٹس میں ردوبدل کرنے والوں کے خلاف سخت قانونی کارروائی کی جائے گی۔
